Այս նմուշը ընդամենը յոթ Ֆաբերժեի նմանատիպ ձվերից է, որոնք մնացել են մասնավոր հավաքածուներում։

Հազվագյուտ բյուրեղյա և ադամանդներով զարդարված Ֆաբերժեի «Բյուրեղապակյա ձուն», որը պատրաստվել է Ռուսական կայսերական ընտանիքի համար մինչև 1917-ի հեղափոխությունը, կհայտնվի Christie’s աճուրդատան վաճառքում։ Ձուն գնահատվում է ավելի քան 20 միլիոն ֆունտ (շուրջ 26,4 միլիոն դոլար)։

Աճուրդատան տվյալներով՝ այս նմուշը ընդամենը յոթ Ֆաբերժեի նմանատիպ ձվերից է, որոնք մնացել են մասնավոր հավաքածուներում։ Աճուրդը նախատեսված է անցկացնել Լոնդոնում։

Մոտ 10 սանտիմետր բարձրությամբ ձուն պատրաստված է բարձրորակ կրիստալից և ամբողջությամբ պատված է պլատինից պատրաստված ձյունահատիկների նուրբ նախշով ու շուրջ 4500 ադամանդով։ Ձվի ներսում տեղադրված է փոքրիկ զարդանախշային զամբյուղ՝ քվարցից պատրաստված ծաղիկներով, որոնք խորհրդանշում են գարունը։

Christie’s-ի ռուսական արվեստի բաժնի ղեկավարը նշել է, որ այս աշխատանքը հիշեցնում է «շքեղ Kinder Surprise»։ 

Ձուն ստեղծվել է դիզայներ Ալմա Փիլի կողմից՝ 1913 թվականին, ըստ Նիկոլայ II-ի պատվերի։ Ցարը այն նվիրել էր իր մորը՝ կայսրուհի Մարիա Ֆյոդորովնային։ Փիլի ստեղծած մյուս Ֆաբերժեի ձուն այսօր գտնվում է Բրիտանիայի թագավորական ընտանիքի հավաքածուում։

Ակնկալվում է, որ ձուն կարող է գերազանցել Ֆաբերժեի ձվերի գործող ռեկորդը՝ 18,5 միլիոն դոլարը, որը սահմանվել էր 2007 թվականին։

Այսօր պահպանվել է 43 կայսերական Ֆաբերժեի ձու, որոնք հիմնականում ցուցադրվում են թանգարաններում։