Պայթյուն՝ Ամիրյան փողոցում. վնասվել են տրանսպորտային միջոցներ, 2 անձ հոսպիտալացվել է

Պայթյուն՝ Ամիրյան փողոցում. վնասվել են տրանսպորտային միջոցներ, 2 անձ հոսպիտալացվել է:

Ժամը 14:43-ին ահազանգ է ստացվել, որ Ամիրյան փողոցում տրանսպորտային միջոց է պայթել։ Դեպքի վայր մեկնած կարգախմբերն ու օպերատիվ խմբերը պարզել են, որ պայթյունը տեղի է ունեցել «Տոյոտա» մակնիշի ավտոմեքենայում։ Այդ մասին  հայտնել է  ՆԳՆ մամուլի խոսնակ Նարեկ Սարգսյանը:


«2 անձ վնասվածքներով տեղափոխվել է հիվանդանոց: Վնասվել են տրանսպորտային միջոցներ։ Հանգամանքները պարզվում են»,- մանրամասնեց Նարեկ Սարգսյանը։


Armenian Business News-ի լրագրող Աննա Գրիգորյանը դեպքի ժամանակ Ամիրյան փողոցում է եղել եւ ահա թե ինչ է պատմում նա. 

Ամիրյան փողոցում տեղի ունեցած պայթյունի պահին հենց դեպքի վայրում էի` կանգառում։ Սարսափելի վախեցած եմ, ձեռքս աննշան քերծվածք ունի, մազերիս մեջ մանր ապակիներ...Բայց լավ եմ, փառք Աստծո, ինքնուրույն տուն եմ եկել...
Բայց լրիվ ուրիշ բանի մասին եմ ուզում ասել. հրաշք մարդիկ կան էս աշխարհում։
Պայթյունից անմիջապես հետո, երբ ես շոկի մեջ կանգառից հետ քաշվեցի ու անվտանգ տեղ էի փնտրում` վախենալով, որ երկրորդ պայթյուն կարող է լինել (դեռ չէի հասկացել ինչ էր իրականում կատարվել) , տեսա ինչպես են բազմաթիվ տղամարդիկ վազում դեպի հենց նոր պայթած մեքենան վարորդին ու հնարավոր վիրավորներին օգնելու, փրկելու համար։ Ու դա անում էին, չնայած նրան, որ դեռ պարզ չէր ինչ է կատարվում և ոչ մեկ երաշխիք չուներ, որ ևս մեկ պայթյուն տեղի չի ունենա։
Հետո հարակից խանութների մարդիկ շտապեցին ինձ ու ինձ նման վախեցածներին ու թեթև վնասվածներին օգնություն ցույց տալ ու հանգստացնել։
Մարդկային շնորհակալություն նման մարդկանց։