Ընդլայնվում է «16 մլն դրամ» բնակարանային ծրագիրը

Աջակցությունը տրամադրվելու է ոչ միայն տվյալ բնակավայրին, այլև կրթահամալիրի սպասարկման ամբողջ տիրույթի գյուղերին։

Կառավարությունը որոշում է ընդունել ընդլայնել բնակարանների կառուցման պետական աջակցությամբ ծրագիրը, որը հայտնի է որպես «16 մլն դրամ» ծրագիր։ Այս մասին հայտնել է ԿԳՄՍ նախարար Ժաննա Անդրեասյանը։

Նրա խոսքով՝ ծրագիրը նախկինում վերաբերում էր սահմանամերձ բնակավայրերին, սակայն այժմ տարածվելու է նաև այն գյուղական համայնքների վրա, որտեղ կառուցվել են կամ կառուցվում են կրթահամալիրներ և դպրոցներ։

Նշվում է, որ աջակցությունը տրամադրվելու է ոչ միայն տվյալ բնակավայրին, այլև կրթահամալիրի սպասարկման ամբողջ տիրույթի գյուղերին։

Նախարարի գնահատմամբ՝ այս որոշումը հակադարձում է այն տեսակետներին, թե կրթահամալիրների ստեղծումը կարող է դատարկել գյուղերը։

«Կրթահամալիրները կառուցում ենք և միաժամանակ աջակցում ենք, որ մարդիկ իրենց գյուղերում տուն կառուցեն, բնակվեն և իրենց երեխաները հենց տեղում ստանան ժամանակակից կրթություն»,- նշել է Անդրեասյանը։

Ծրագրի ընդլայնումը նպատակ ունի խթանել գյուղական բնակավայրերում բնակության պահպանումը և զարգացնել կրթական ու սոցիալական միջավայրը։