Ակցիզային հարկերը աճել են ավելի արագ, քան ընդհանուր հարկային եկամուտները. ՊԵԿ

Պետական եկամուտների կոմիտեի նախագահ Էդուարդ Հակոբյանը սեպտեմբերի 12-ին Ազգային ժողովում հայտարարեց, որ ակցիզային հարկերի ծավալները 2025թ. հունվար-օգոստոս ամիսներին աճել են 15.5%-ով։

Աճի տեմպը նույնիսկ գերազանցում է ընդհանուր հարկային եկամուտների 14%-անոց աճը։

Արծվիկ Մինասյանի հարցին պատասխանելով՝ Հակոբյանը հիշեցրեց, որ իշխանությունների նախաձեռնությունն ուղղված է եղել ոչ թե միայն բյուջեի եկամուտների ավելացմանը, այլ տնտեսական զարգացման խթանմանը․ ուղիղ հարկերի նվազեցման հետ զուգահեռ իրականացվել է անուղղակի հարկերի՝ այդ թվում ակցիզների բարձրացում։

Պատգամավորը հիշեցրել էր, որ ակցիզային հարկի չափը այս տարի բարձրացվել է 400 դրամով՝ կազմելով 4200 դրամ, իսկ հաջորդ տարվանից այն կավելանա մինչև 4600 դրամ։

Հակոբյանի խոսքով՝ ցուցանիշները վկայում են, որ ակցիզային հարկերի բարձրացումը զգալի ազդեցություն ունի բյուջեի եկամուտների ձևավորման վրա։