Եվրոպայում էներգետիկ ճգնաժամը նոր փուլ է մտնում՝ գազի գների կտրուկ աճով

Եվրոպայում գազի գները վերջին օրերին աճել են շուրջ 12%-ով։

Եվրոպայում գազի գները վերջին օրերին աճել են շուրջ 12%-ով՝ պայմանավորված Նորվեգիայի մատակարարման ժամանակավոր կրճատմամբ և Մերձավոր Արևելքի լարված իրավիճակով։ Այս զարգացումը խուճապ է առաջացրել մասնավորապես Գերմանիայի և Իտալիայի արդյունաբերական ոլորտներում։

Գերմանիայի էկոնոմիկայի նախարարությունը հայտարարել է, որ կառավարությունը պատրաստվում է օգտագործել պահեստային գազային պաշարների մի մասը՝ գների կայունացման նպատակով։ Այնուամենայնիվ, մասնագետները նշում են, որ նման միջամտությունները կարող են կարճաժամկետ ազդեցություն ունենալ, մինչդեռ երկարաժամկետ լուծում կարող է ապահովել միայն վերականգնվող էներգետիկայի մասշտաբային ներդրումը։

Նորվեգիայի Equinor ընկերությունը հայտնել է, որ տեխնիկական խնդիրների պատճառով արտադրությունը կվերականգնվի միայն շաբաթվա վերջում։ Եվրոպական էներգետիկ ֆյուչերսները միաժամանակ աճել են մինչև 45 եվրո մեկ մեգավատ ժամի դիմաց՝ 2024-ի սեպտեմբերից հետո առաջին անգամ։