Եվրահանձնաժողովը տարեվերջին ռուսներին վիզաների տրամադրման նոր ռազմավարություն կներկայացնի

ԵՄ-ն պատրաստվում է խստացնել իր դիրքորոշումը Ռուսաստանի քաղաքացիներին վիզաներ տրամադրելու հարցում։

Եվրահանձնաժողովը (ԵՀ) նոր ռազմավարություն է մշակում՝ ՌԴ քաղաքացիներին շենգենյան վիզաներ տրամադրելու վերաբերյալ, որը կներկայացվի 2025 թվականի վերջին։ Այս մասին Բրյուսելում կայացած ճեպազրույցի ժամանակ հաստատել է ԵՀ ներկայացուցիչ Մարկուս Լամմերտը։

«Ինչ վերաբերում է ռազմավարությանը, որը մենք կներկայացնենք տարեվերջին, ապա նոր վիզային ռազմավարությունն իսկապես մշակման փուլում է», - ասել է նա։

Նախկինում եվրոպական Politico պարբերականը հայտնել էր, որ ԵՄ-ն պատրաստվում է խստացնել իր դիրքորոշումը Ռուսաստանի քաղաքացիներին վիզաներ տրամադրելու հարցում։ Հրապարակման մեջ նշվում էր, որ Բրյուսելը մինչև տարեվերջ մտադիր է նոր կարգադրություններ հրապարակել դաշինքի երկրների համար, որոնք ավելի կոշտ հանձնարարականներ կպարունակեն ռուսներին վիզաներ տրամադրելու վերաբերյալ։

Եվրամիության վերջին տվյալների համաձայն՝ 2024 թվականին ՌԴ քաղաքացիներին տրվել է շուրջ 542 հազար կարճաժամկետ վիզա՝ ԵՄ երկրներ և Շենգենյան գոտու այլ պետություններ, այդ թվում՝ Շվեյցարիա, մեկնելու համար։ Սա մոտ 20%-ով ավելի է, քան 2023 թվականին, սակայն զգալիորեն պակաս է 2019 թվականի ցուցանիշներից։