Եվրոպական միության խորհուրդը հոկտեմբերի 12-ին պատժամիջոցային ցուցակներում ներառել է Ռուսաստանի ռազմարդյունաբերական համալիրի հետ կապված 826 ընկերություն և 743 ֆիզիկական անձ (ընդհանուր առմամբ՝ 1569 սուբյեկտ): ԵՄ խորհրդում սա անվանել են պատժամիջոցների ցուցակների ամենախոշոր միանվագ ընդլայնումը՝ Ուկրաինայի դեմ պատերազմի մեկնարկից ի վեր:
Ինչու է դա կարևոր. Նոր սահմանափակումները միտված են ռուսական ռազմական արտադրության առանցքային մատակարարման շղթաների կտրմանը՝ թիրախավորելով հատկապես բարձր տեխնոլոգիական, էլեկտրոնային և միկրոէլեկտրոնային բաղադրիչներ ապահովող միջին օղակի ձեռնարկություններին:
Սահմանափակումների աշխարհագրությունն ու ոլորտները.
Թիրախային ապրանքատեսակներ. Հարձակողական ԱԹՍ-ների, հրթիռների և ավիացիոն տեխնիկայի համար մատակարարվող էլեկտրոնային բաղադրիչներ, կիսահաղորդիչներ, միկրոսխեմաներ, ռադարներ, նավիգացիոն և օպտիկական համակարգեր:
Ոլորտային բաշխում (նախնական գնահատական). Շուրջ 140 կազմակերպություն ներկայացնում է ռադիոէլեկտրոնային ոլորտը, 20–30-ը՝ միկրոէլեկտրոնիկան ու կիսահաղորդիչները, իսկ 10–15-ը՝ ԳԲՀ-էլեկտրոնիկան:
Իրավական հետևանքներ. Ցուցակում ընդգրկվածների ակտիվները ԵՄ տարածքում ենթակա են սառեցման, իսկ ֆիզիկական անձանց արգելվում է մուտքն ու տարանցումը ԵՄ տարածքով: Արգելված է նաև որևէ ֆինանսական կամ տնտեսական ռեսուրսի տրամադրումը նրանց:
