Էկոնոմիկայի նախարարը գործարարների հետ քննարկել է սահմանների ապաշրջափակման տնտեսական հնարավորությունները

Առանձնահատուկ կարևորություն է տրվում սահմանամերձ հատվածներում լոգիստիկ ենթակառուցվածքների ձևավորմանը։

Հունվարի 13-ին ՀՀ էկոնոմիկայի նախարարությունում, նախարար Գևորգ Պապոյանի մասնակցությամբ, տեղի է ունեցել հանդիպում-քննարկում՝ ավելի քան երեք տասնյակ գործարարների և ներդրողների հետ։

Էկոնոմիկայի նախարարությունից տեղեկացնում են, որ հանդիպմանը ներկա է եղել նաև նախարարի տեղակալ Անուշիկ Ավետյանը։

Նախարար Գևորգ Պապոյանը նշել է, որ ՀՀ Կառավարությունը հետևողականորեն առաջ է տանում սահմանների ապաշրջափակման օրակարգը և ակնկալում է, որ Թուրքիայի հետ սահմանների բացման դեպքում կձևավորվեն նոր տնտեսական և լոգիստիկ հնարավորություններ։

Նրա խոսքով՝ առանձնահատուկ կարևորություն է տրվում սահմանամերձ հատվածներում լոգիստիկ ենթակառուցվածքների ձևավորմանը։

Նախարարն ընդգծել է, որ պետության համար առաջնահերթ են՝

• մաքսային պահեստների,

• մաքսային տերմինալների,

• լոգիստիկ կենտրոնների ստեղծման ծրագրերը։

Այս ենթակառուցվածքները, ըստ նրա, կարող են ապահովել առևտրի և տարանցման արդյունավետ կազմակերպում սահմանների բացման պարագայում։

Գևորգ Պապոյանը նաև անդրադարձել է պետական աջակցության գործիքակազմին, որոնցից ընկերությունները կարող են օգտվել՝

• լոգիստիկ ծրագրերի իրականացման,

• ներդրումային նախաձեռնությունների զարգացման նպատակով։

Հանդիպման ընթացքում նախարարը պատասխանել է մասնակիցների հարցերին, ներկայացրել պարզաբանումներ և անդրադարձել գործարարներին հուզող մի շարք թեմաների։