Էկոնոմիկայի նախարարության պաշտոնատար անձին մեղադրանք է ներկայացվել կաշառք ստանալու գործով

Քրեական վարույթով նախաքննությունն ավարտվել է

ՀՀ հակակոռուպցիոն կոմիտեում քննված քրեական վարույթով իրականացված նախաքննությամբ հիմնավորվել է, որ ՀՀ էկոնոմիկայի նախարարության համապատասխան վարչության պաշտոնատար անձը, օգտագործելով իր ծառայողական լիազորությունները և դրանցով պայմանավորված ազդեցությունը, տնտեսվարողի օգտին ապօրինի գործողություն կատարելու համար ստացել է կաշառք։ Այդ մասին տեղեկացնում են Հակակոռուպցիոն կոմիտեից։

Նախաքննությամբ պարզվել է, որ Հնդկաստանից Հայաստանի Հանրապետություն բնական մշակված ադամանդների ներմուծման ընթացքում պետական վերահսկողական ակտ կազմելու գործընթացում խոչընդոտներ չստեղծելու և ներմուծման ընթացքն արագացնելու նպատակով պաշտոնատար անձը 2025 թվականի մայիսի 13-ին «Զվարթնոց» օդանավակայանում կաշառք է ստացել տնտեսվարողից։

Դեպքի առնչությամբ ՀՀ էկոնոմիկայի նախարարության պաշտոնատար անձին մեղադրանք է ներկայացվել ՀՀ քրեական օրենսգրքի 435-րդ հոդվածի 2-րդ մասի 3-րդ կետով, իսկ կաշառք տված անձին՝ ՀՀ քրեական օրենսգրքի 436-րդ հոդվածի 2-րդ մասի 3-րդ կետով։

Քրեական վարույթով նախաքննությունն ավարտվել է, և գործի նյութերը մեղադրական եզրակացությամբ ուղարկվել են հսկող դատախազին՝ այն հաստատելու և դատարան ուղարկելու միջնորդությամբ։

Հակակոռուպցիոն կոմիտեն հիշեցնում է, որ անձը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով՝ դատարանի օրինական ուժի մեջ մտած դատավճռով։