Տնտեսական աճը արագացել է, տոկոսադրույքը պահպանվել է անփոփոխ․ ԿԲ

Այս ռիսկերի հավասարակշռման արդյունքում ԿԲ խորհուրդը որոշել է պահպանել քաղաքականության տոկոսադրույքը անփոփոխ։

2025 թվականի չորրորդ եռամսյակում Հայաստանում տնտեսական աճը արագացել է։ Այս մասին հայտնում են ՀՀ Կենտրոնական բանկից։

ԿԲ գնահատմամբ՝ բարձր տնտեսական աճին հիմնականում նպաստել են շինարարության, ծառայությունների և մշակող արդյունաբերության ոլորտները։

Միաժամանակ ԿԲ-ն նշում է, որ պահանջարկի վերաբերյալ անորոշությունն աճել է՝ պայմանավորված տնտեսական աճի կառուցվածքային խնդիրներով և հարկաբյուջետային քաղաքականության ընդլայնման ռիսկերով։

Գնաճի վրա պահանջարկի ազդեցությունը գնահատվում է ընդլայնող, իսկ որոշ դեպքերում առկա են նաև առաջարկի գործոններով պայմանավորված գնաճային ռիսկեր։

ԿԲ տվյալներով՝ մասնավոր աշխատավարձերի աճը, ծառայությունների ոլորտում գների փոփոխությունները և գնաճային սպասումները շարունակում են ցուցադրել հարաբերական կայունացման միտումներ։

Ֆինանսական շուկայի մասնակիցները կանխատեսում են, որ ԿԲ-ն կպահպանի տոկոսադրույքի ներկայիս մակարդակը ավելի երկար ժամանակահատվածում՝ միջնաժամկետում այն նվազեցնելով մինչև 6.25%։

ԿԲ խորհուրդը դիտարկել է երկու հիմնական սցենար՝

  • պահանջարկի աճի և արտաքին տոկոսադրույքների բարձրացման ռիսկեր, որոնք ենթադրում են ավելի բարձր տոկոսադրույք,

  • համաշխարհային տնտեսության դանդաղման և ներքին ռիսկերի նվազման սցենարներ, որոնք ենթադրում են ավելի ցածր տոկոսադրույք։

Այս ռիսկերի հավասարակշռման արդյունքում ԿԲ խորհուրդը որոշել է պահպանել քաղաքականության տոկոսադրույքը անփոփոխ։

ԿԲ-ն նշում է, որ կշարունակի հետևել տնտեսական զարգացումներին և անհրաժեշտության դեպքում կիրականացնի համապատասխան քայլեր՝ ապահովելու գնաճի 3% թիրախը և գների կայունությունը։