Դուբայի անշարժ գույքի շուկան հայտնվել է ճնշման տակ տարածաշրջանային լարվածության ֆոնին

Վերլուծաբանների խոսքով՝ գների զանգվածային անկման վերաբերյալ պաշտոնական տվյալներ դեռևս չկան։

Իրանի տարածքին ԱՄՆ-ի և Իսրայելի հարվածներից, ինչպես նաև ԱՄԷ-ի ուղղությամբ Իրանի պատասխան հրթիռային հարվածներից հետո Դուբայի անշարժ գույքի շուկան հայտնվել է ճնշման տակ։

Reuters գործակալության գնահատմամբ՝ աշխարհաքաղաքական լարվածության աճը լուրջ փորձություն է դարձել ոլորտի համար՝ հարվածելով ԱՄԷ-ի՝ որպես ներդրումների համար անվտանգ ուղղության հեղինակությանը։

Ներդրողները քննարկում են շուկայական ակտիվության ժամանակավոր նվազման հնարավորությունը և ավելի զգույշ են մոտենում գործարքներին, հատկապես օտարերկրյա գնորդները։

Կառուցապատողները խոսում են կայունության մասին

Միևնույն ժամանակ խոշոր կառուցապատողները, այդ թվում՝ Emaar Properties-ը, հայտարարում են, որ շուկան մնում է կայուն՝ հիմնարար գործոնների շնորհիվ։ Նշվում են զրոյական հարկային քաղաքականությունը, կապիտալի շարունակվող ներհոսքը և գործարքների մեծ ծավալը։

Financial Times-ը գրում է, որ հանրահայտ թաղամասերում, օրինակ՝ Փալմ Ջումեյրայում, առօրյա ակտիվությունը պահպանվում է, սակայն շուկայի մասնակիցների տրամադրություններում որոշակի տագնապ է նկատվում։

Վերլուծաբանների խոսքով՝ գների զանգվածային անկման վերաբերյալ պաշտոնական տվյալներ դեռևս չկան։ Խոսքը հիմնականում սպասումների և հնարավոր ռիսկերի գնահատման մասին է։

Times of India-ն նշում է, որ պահանջարկի և գների իրական փոփոխությունները կարող են դրսևորվել ավելի ուշ՝ իրավիճակի կայունացումից հետո։

Emaar Properties-ի հիմնադիրը Dunya News-ին տված հարցազրույցում հայտարարել է, որ Դուբայի բնակարանային շուկան չպետք է վախենա կարճաժամկետ ցնցումներից, քանի որ դրա հիմնարար ցուցանիշները մնում են ուժեղ։