Դոնալդ Թրամփը որոշել է ԱՄՆ-ն դուրս բերել ՅՈՒՆԵՍԿՕ-ից

Սպիտակ տունը պնդում է, որ ԱՄՆ պետք է անդամակցի միայն այն միջազգային կառույցներին, որոնք համահունչ են իր ազգային շահերին։

ԱՄՆ նախագահ Դոնալդ Թրամփը որոշում է կայացրել դուրս բերել Միացյալ Նահանգները ՅՈՒՆԵՍԿՕ-ից՝ հիմնավորելով դա կազմակերպության «պաղեստինամետ և չինականամետ» մոտեցումներով։ 
Սպիտակ տան մամուլի քարտուղարի տեղակալ Աննա Քելլին հայտարարել է, որ ՅՈՒՆԵՍԿՕ-ն աջակցում է մշակութային և սոցիալական այնպիսի նախաձեռնությունների, որոնք «հակասում են առողջ բանականությանը»։
Ըստ Քելլիի՝ Թրամփի վարչակազմը վերանայել է ԱՄՆ անդամակցությունը և եզրակացրել, որ ՅՈՒՆԵՍԿՕ-ն չի համապատասխանում երկրի ազգային շահերին։ Ավելի վաղ Թրամփը նաև հանձնարարել էր 90-օրյա ուսումնասիրություն անցկացնել՝ պարզելու՝ որքան նպատակահարմար է ԱՄՆ ներկայությունը ՅՈՒՆԵՍԿՕ-ում։ 
Սա առաջին նման քայլը չէ. ԱՄՆ-ն արդեն հայտարարել էր նաև ՄԱԿ-ի մարդու իրավունքների որոշ ծրագրերի ֆինանսավորման դադարեցման մասին՝ հատկապես Ուկրաինայում իրականացվող նախաձեռնությունների շրջանակում։ Սպիտակ տունը պնդում է, որ ԱՄՆ պետք է անդամակցի միայն այն միջազգային կառույցներին, որոնք համահունչ են իր ազգային շահերին։