Ամուսնալուծությունների ցուցանիշը Հայաստանում հասել է վերջին տարիների առավել բարձր մակարդակին

Հայաստանում ամուսնալուծությունների դեպքերը շարունակում են աճել։ Ազգային վիճակագրական կոմիտեի (ԱՎԿ) տվյալներով՝ 2025 թվականի հունվար-օգոստոս ամիսներին գրանցված յուրաքանչյուր 1000 ամուսնության հաշվով արձանագրվել է 354 ամուսնալուծություն, ինչը զգալի աճ է նախորդ տարվա համեմատ։

2024-ի նույն ժամանակահատվածում այդ ցուցանիշը կազմել էր 292 ամուսնալուծություն 1000 ամուսնության հաշվով, այսինքն՝ մեկ տարում բաժանությունների հարաբերական թիվը աճել է շուրջ 21 տոկոսով։

Ընդհանուր առմամբ, այս տարվա առաջին ութ ամիսներին Հայաստանում արձանագրվել է 3 179 ամուսնալուծություն, ինչը նախորդ տարվա համեմատ 4.5 տոկոս աճ է ցույց տալիս։

Միևնույն ժամանակ, նվազել է ամուսնությունների ընդհանուր քանակը։ Եթե 2024-ի հունվար-օգոստոսին գրանցվել էր 10 405 ամուսնություն, ապա 2025-ի նույն ամիսների ընթացքում դրանց թիվը կազմել է ընդամենը 8 985, ինչը շուրջ 13.6 տոկոս անկում է։

Փորձագետները նշում են, որ ամուսնությունների թվի կրճատման և ամուսնալուծությունների աճի միտումները նկատվում են վերջին տարիներին՝ պայմանավորված սոցիալ-տնտեսական դժվարություններով, արտագաղթի աճով և արժեքային փոփոխություններով։

Այս տվյալները վկայում են, որ ընտանիքի ինստիտուտը Հայաստանում կանգնած է լուրջ սոցիալական մարտահրավերների առաջ, որոնք պահանջում են ինչպես սոցիալական քաղաքականության վերանայում, այնպես էլ հասարակական իրազեկման խորացում՝ ամուր ընտանիքների ձևավորման ուղղությամբ։