Քննարկվել է ջրային քաղաքականության և կրթության համադրման հարցը

ԿԳՄՍ նախարարության կողմից ներկայացվել է նաև շուրջ 40 բնակավայրի դպրոցներում ջրի հետ կապված խնդիրների վերաբերյալ տեղեկատվություն։

Ջրային կոմիտեի նախագահ Արամազդ Ղալամքարյանը հանդիպել է ԿԳՄՍ նախարար Ժաննա Անդրեասյանի և վարչապետի հասարակական հիմունքներով խորհրդական Անժելա Կժդրյանի հետ՝ քննարկելու ջրային ոլորտում կրթական և գիտական բաղադրիչների զարգացումը։

Հանդիպման ընթացքում ուշադրություն է դարձվել ջրային քաղաքականության շրջանակում կրթության, գիտության և հանրային իրազեկման ուղղությունների ամրապնդմանը։ Քննարկվել է բուհերի և գիտահետազոտական կառույցների հետ համագործակցության խորացումը՝ կիրառական գիտելիքի ներգրավման նպատակով։

Առանձնացվել է ոլորտում մասնագետների պակասի խնդիրը, ինչպես նաև ջրի խնայող օգտագործման մշակույթի ձևավորման անհրաժեշտությունը՝ հանրային իրազեկման միջոցով։

Անդրադարձ է կատարվել էկոկրթական ծրագրերի թիրախային մշակմանը՝ հաշվի առնելով Հայաստանի տարբեր տարածաշրջանների ջրային առանձնահատկությունները։ Քննարկվել է նաև տեղական բուհերից մեկում միջազգային կրթական ծրագրի ներդրման հնարավորությունը՝ պիլոտային ձևաչափով։

ԿԳՄՍ նախարարության կողմից ներկայացվել է նաև շուրջ 40 բնակավայրի դպրոցներում ջրի հետ կապված խնդիրների վերաբերյալ տեղեկատվություն։

Ջրային կոմիտեն պատրաստակամություն է հայտնել ուսումնասիրել բարձրացված հարցերը՝ «Հայաստան․ դիմակայուն Սյունիք» և WISE ծրագրերի շրջանակում։ Առաջարկվել է ստեղծել աշխատանքային խումբ՝ ծրագրերի մշակման և իրականացման նպատակով։

Քննարկումները ուղղված են ջրային քաղաքականության և կրթական համակարգի փոխկապակցվածության ուժեղացմանը՝ ոլորտային խնդիրների համակարգային լուծման համար։