Դեկտեմբերի 9-ի կարևոր լուրերը

Ինչ է կատարվել Հայաստանում և աշխարհում։

Ռուբեն Վարդանյանի շինծու «դատավարությունը» Բաքվում շարունակվում է
Բաքվում շարունակվել է հայ գերիների, այդ թվում՝ Արցախի նախկին պետնախարար Ռուբեն Վարդանյանի շինծու դատավարությունը։ «Տուժողների» հերթական ցուցմունքներն են լսվել։ Վարդանյանը միջնորդել է ծանոթանալ գործի նյութերի մի մասին, ինչը դատարանը բավարարել է։ Հաջորդ նիստը՝ այսօր։

Նիկոլ Փաշինյանը պաշտոնական այցով Գերմանիայում է
Վարչապետ Փաշինյանը մեկնարկել է երկօրյա պաշտոնական այցը Գերմանիա, որտեղ հանդիպումներ կունենա նախագահի, կանցլերի և Համբուրգի ղեկավարների ու գործարարների հետ։

Մառախուղ և բարդ եղանակ՝ ճանապարհներին
Փրկարար ծառայությունը հայտնում է՝ Վարդենյաց լեռնանցքում, «Մեղրու սար»-ում, Աշտարակում ու Արտաշատ–Երևան հատվածում մառախուղ է։ Վարորդներին հորդորվում է օգտագործել ձմեռային անվադողեր։ Լարսի ճանապարհը բաց է։

«3+3» հարթակում քննարկվում է հաջորդ հանդիպման վայրի հարցը
ԱԳՆ-ի տեղեկացմամբ՝ նախարական հաջորդ հանդիպման վայրը դեռ կհամաձայնեցվի դիվանագիտական ուղիներով։ Ադրբեջանը առաջարկում է այն անցկացնել Բաքվում, հաջորդը՝ Երևանում։

Երեխայի ծննդի գրանցումը՝ արդեն առցանց
ՀՀ-ում նորածնի ծնունդը կարելի է գրանցել Hartak.am հարթակում․ անհրաժեշտ է նույնականացման քարտ և «Ես եմ» համակարգով նույնականացում։ Վկայականը տրամադրվում է էլեկտրոնային եղանակով։

ԱՄՆ դեսպանը խոսել է տնտեսական նոր հնարավորությունների մասին
Դեսպան Քվինը նշել է ԱՄՆ–Հայաստան համագործակցության խորացման ուղղությունները՝ «Թրամփի ուղու» տնտեսական և տրանսպորտային հնարավորությունները, էներգետիկ անվտանգությունը, տեխնոլոգիական և ներդրումային ծրագրերը։

Բագրատ սրբազանի գործով դատական նիստը հետաձգվել է
Պաշտպան Հովհաննես Խուդոյանը հայտնել է, որ եպիսկոպոսաց ժողովը հետաձգվելու պատճառով հրաժարվել են խափանման միջոցի փոփոխման միջնորդությունից։ Նոր նիստը՝ հինգշաբթի, ժամը 14:00։