Դեկտեմբերի 30-ի կարևոր լուրերը

Ինչ է կատարվել Հայաստանում և աշխարհում։

Հայաստան–Թուրքիա հարաբերություններ
Հայաստան–Թուրքիա հարաբերությունների կարգավորման գործընթացի հատուկ ներկայացուցիչների միջև ձեռք բերված պայմանավորվածությունների շրջանակներում կողմերը որոշել են դյուրացնել վիզաների տրամադրման գործընթացը դիվանագիտական, հատուկ և ծառայողական անձնագրեր կրողների համար։ ԱԳՆ–ի հաղորդմամբ՝ 2026 թվականի հունվարի 1-ից երկու երկրների դիվանագիտական, ծառայողական և հատուկ անձնագիր կրող քաղաքացիները կկարողանան անվճար էլեկտրոնային վիզա ստանալ։ Կողմերը վերահաստատել են իրենց հանձնառությունը՝ առանց նախապայմանների հասնելու լիարժեք կարգավորման։

Ճանապարհային իրավիճակ ՀՀ-ում
Փրկարար ծառայությունը հայտնում է, որ հանրապետությունում կան փակ և դժվարանցանելի ավտոճանապարհներ։ Արագածոտնի մարզում փակ են «Ամբերդ» կայանից դեպի Ամբերդ ամրոց և Քարի լիճ տանող ճանապարհները, ինչպես նաև Բերդ–Ճամբարակ ավտոճանապարհը։ Մի շարք ուղղություններ փակ են կցորդով բեռնատարների համար, Վարդենյաց լեռնանցքը դժվարանցանելի է, իսկ Վանաձորի տարածաշրջանում տեղ-տեղ առկա է մերկասառույց։ Վարորդներին հորդորվում է երթևեկել միայն ձմեռային անվադողերով։

Ընտրակաշառքի գործ Վաղարշապատում
Վաղարշապատում ավագանու ընտրությունների հետ կապված ընտրակաշառքի գործով ձերբակալվել են Խաչիկ Գալստյանը և ևս 9 անձ։ Հակակոռուպցիոն կոմիտեի փոխանցմամբ՝ ձերբակալվածների թվում է նաև Արմավիրի մարզպետի նախկին տեղակալը։ Մեկ անձ կալանավորվել է, երեքի նկատմամբ կիրառվել է տնային կալանք, իսկ մի քանի անձանց մասով կալանքի միջնորդություններ են ներկայացվել դատարան։

Պաշտպանական ոլորտ
ՀՀ պաշտպանության նախարարի առաջին տեղակալ, ԶՈՒ ԳՇ պետ Էդվարդ Ասրյանը գալիք տոների կապակցությամբ այցելել է հանրապետության արևելյան սահմանագոտի՝ անձնակազմին շնորհավորելու նպատակով։

Ռուսաստանի դիրքորոշումը «Թրամփի ճանապարհ» նախաձեռնության վերաբերյալ
Ռուսաստանը հետևում է «Թրամփի ճանապարհ միջազգային խաղաղության և բարգավաճման համար» հայ-ամերիկյան նախաձեռնության շուրջ զարգացումներին, սակայն այն դեռ գնահատում է որպես չձևավորված նախագիծ։ ՌԴ դեսպան Սերգեյ Կոպիրկինի խոսքով՝ Մոսկվան իր դիրքորոշումը կհայտնի գործնական փուլում՝ հաշվի առնելով Հայաստանի ԵԱՏՄ անդամակցությունը և տրանսպորտային կանոնակարգերը։

Էլեկտրաէներգիայի սակագներ
Հանրային ծառայությունները կարգավորող հանձնաժողովը հաստատել է էլեկտրաէներգետիկական համակարգի խոշոր արտադրողների և ծառայություններ մատուցողների սակագները։ Վերլուծության արդյունքում «Հայաստանի էլեկտրական ցանցեր» ՓԲԸ-ի կողմից սպառողներին վաճառվող էլեկտրաէներգիայի սակագները կմնան անփոփոխ։