Դեկտեմբերի 19-ի բիզնես լուրերը

Ինչ է կատարվել Հայաստանի և միջազգային տնտեսական աշխարհում։

ՏԵՂԱԿԱՆ ԼՈՒՐԵՐ

Արտակարգ իրավիճակներում արտերկրում ՀՀ անձնագրերը կտրամադրվեն առանց պետտուրքի
Կառավարությունը որոշում է ընդունել արտակարգ իրավիճակների դեպքում օտարերկրյա պետություններում ՀՀ անձնագրերը տրամադրել առանց պետական տուրքի։ Ազատումը կվերաբերի ազգությամբ հայ օտարերկրյա քաղաքացիներին և ՀՀ քաղաքացիներին, եթե մշտական բնակության երկրում ստեղծվել է իրավիճակ, որը սպառնում է նրանց կյանքին կամ առողջությանը։

Էլեկտրամոբիլների չօգտագործված քվոտան կվերաբաշխվի, մաքսատուրքերը կվերադարձվեն
Էկոնոմիկայի նախարար Գևորգ Պապոյանի խոսքով՝ 2025 թվականի դիլերների կողմից չօգտագործված էլեկտրամոբիլների քվոտան կվերաբաշխվի ֆիզիկական և իրավաբանական անձանց միջև։ Այն քաղաքացիները, որոնք 5000-րդ քվոտայից հետո մեքենա են ներմուծել և վճարել մաքսատուրք, կստանան դրա վերադարձը։

ՀՀ բանկային համակարգում մուտքերը 10 ամսում կազմել են 9․73 տրիլիոն դրամ
Վիճակագրական կոմիտեի տվյալներով՝ 2025 թվականի հունվար-հոկտեմբերին բանկային համակարգի դրամարկղային մուտքերը կազմել են 9․73 տրիլիոն դրամ։ Ելքերը կազմել են 9․74 տրիլիոն դրամ՝ մուտքերը գերազանցելով 14․6 մլրդ դրամով։

Ոստիկանությունը զգուշացնում է անձնական տվյալների փոխանցման վտանգների մասին
ՆԳՆ ոստիկանությունը հորդորում է քաղաքացիներին անծանոթ անձանց որևէ դեպքում չտրամադրել անձնագրային, բանկային տվյալներ, մուտքանուններ, գաղտնաբառեր և մեկանգամյա կոդեր՝ խուսափելու ֆինանսական հափշտակություններից և կիբեռհանցագործություններից։

Հանքարդյունաբերությունը տնտեսության կարևոր հենասյուն է
Շրջակա միջավայրի նախարար Համբարձում Մաթևոսյանի խոսքով՝ հանքարդյունաբերությունը տնտեսության առանցքային ոլորտ է, սակայն պահանջում է բարձր պատասխանատվություն բնապահպանական ռիսկերի կառավարման հարցում։ Նա կարևորել է համալսարան–արդյունաբերություն համագործակցությունը՝ որպես ոլորտի կայուն զարգացման հիմք։

ՄԻՋԱԶԳԱՅԻՆ ԼՈՒՐԵՐ

Թրամփը հաստատել է ԱՄՆ պաշտպանական բյուջեն՝ 900 միլիարդ դոլարի չափով
ԱՄՆ նախագահ Դոնալդ Թրամփը ստորագրել է 2026 ֆինանսական տարվա պաշտպանական բյուջեն։ Այն նախատեսում է զինծառայողների աշխատավարձի բարձրացում, Չինաստանում ամերիկյան ներդրումների սահմանափակումներ և Ուկրաինային 400 միլիոն դոլարի ռազմական օգնություն։

Նոյեմբերին ԱՄՆ-ում գնաճը եղել է սպասվածից ցածր
2025 թվականի նոյեմբերին ԱՄՆ-ում տարեկան գնաճը կազմել է 2.7 տոկոս՝ կանխատեսված 3.1 տոկոսի փոխարեն։ Տնտեսագետները նշում են, որ դանդաղումը կարող է ժամանակավոր լինել, և դեկտեմբերին գնաճը հնարավոր է կրկին արագանա։

ԱՄՆ-ն կասեցնում է Գրին քարտ վիճակախաղի ծրագիրը
ԱՄՆ իշխանությունները որոշել են կասեցնել Գրին քարտ վիճակախաղի ծրագիրը անվտանգության մտահոգությունների պատճառով։ Ծրագիրը գործարկվել էր 1990-ականներին և տարեկան շուրջ 50 հազար վիզա էր տրամադրում։

TikTok-ը համաձայնել է ԱՄՆ-ում իր ակտիվները փոխանցել ամերիկացի ներդրողներին
ByteDance ընկերությունը համաձայնագիր է ստորագրել TikTok-ի ամերիկյան ստորաբաժանումը ԱՄՆ ներդրողների վերահսկողության տակ գտնվող համատեղ ձեռնարկությանը փոխանցելու վերաբերյալ։ Նոր կառույցը պատասխանատու կլինի տվյալների պաշտպանության և բովանդակության վերահսկման համար։