Դեկտեմբերի 16-ի բիզնես լուրերը

Ինչ է կատարվել Հայաստանի և միջազգային տնտեսական աշխարհում։

ՏԵՂԱԿԱՆ ԼՈՒՐԵՐ

Հայաստանի կենտրոնական բանկը իջեցրել է վերաֆինանսավորման տոկոսադրույքը

ՀՀ ԿԲ խորհրդի դեկտեմբերի 16-ի նիստում որոշվել է վերաֆինանսավորման տոկոսադրույքը իջեցնել 0.25 տոկոսային կետով և սահմանել 6.50 տոկոս։ Լոմբարդային ռեպոյի տոկոսադրույքը սահմանվել է 8.00 տոկոս, իսկ բանկերից ներգրավվող միջոցներինը՝ 5.00 տոկոս։

Հայաստանում զբոսաշրջային կլաստերներում կներդրվի 120 միլիոն եվրո

Գալիք հինգ տարիներին Հայաստանի յոթ զբոսաշրջային կլաստերներում կներդրվի 120 միլիոն եվրո։ 100 միլիոնը համաշխարհային բանկի վարկային միջոցներ են, իսկ 20 միլիոնը կհատկացնի ՀՀ կառավարությունը։ Ներդրումները կուղղվեն ճանապարհների, թանգարանների, քայլուղիների և համայնքային ենթակառուցվածքների զարգացմանը։

Երևանում տրանսպորտի վճարում չկատարելու համար կազմվել է 1370 արձանագրություն

Օգոստոսի 19-ից դեկտեմբերի 15-ը Երևանի հանրային տրանսպորտում վճարումը չկատարելու համար կազմվել է շուրջ 1370 արձանագրություն։

Բազմաբնակարան շենքերի բնակարանների վաճառքի գործարքները հոկտեմբերին կազմել են 2537

2025 թվականի հոկտեմբերին ՀՀ-ում իրականացվել է բազմաբնակարան շենքերի բնակարանների 2537 առուվաճառքի գործարք, որոնց 72.2 տոկոսը բաժին է ընկել Երևանին։

Առաջարկվում է երեխայի ծննդյան համար սահմանել միասնական 500 հազար դրամ նպաստ

ԱՍՀ նախարարությունը առաջարկում է բոլոր երեխաների համար սահմանել ծննդյան միանվագ 500 հազար դրամ նպաստ՝ անկախ հերթականությունից։ Նպաստից օգտվելու պայմաններից մեկը կլինի երեխայի ՀՀ քաղաքացիությունը։

ՄԻՋԱԶԳԱՅԻՆ ԼՈՒՐԵՐ

Թրամփը 5 միլիարդ դոլարի հայց է ներկայացրել BBC-ի դեմ

Դոնալդ Թրամփը BBC-ին մեղադրել է զրպարտության մեջ՝ Կապիտոլիումի գրոհի օրվա ելույթի մոնտաժման պատճառով և ներկայացրել 5 միլիարդ դոլարի հայց։

Netflix-ը ցանկանում է ավարտին հասցնել Warner Bros-ի ակտիվների գնման գործարքը

Netflix-ը հույս ունի ավարտին հասցնել Warner Bros-ի մի շարք ակտիվների ձեռքբերման գործընթացը՝ այն գնահատելով 27.75 դոլար մեկ բաժնետոմսի համար։

Գերմանական ավտոարտադրողների շահույթը կտրուկ նվազել է

Volkswagen-ի BMW-ի և Mercedes-Benz-ի գործառնական շահույթը 2025 թվականի երրորդ եռամսյակում նվազել է գրեթե 76 տոկոսով՝ հասնելով շուրջ 1.7 միլիարդ եվրոյի։

Ռուսաստանի կառավարությունը հաստատել է բյուջետային կանխատեսումը մինչև 2042 թվականը

ՌԴ կառավարությունը հաստատել է բյուջետային կանխատեսումը մինչև 2042 թվականը՝ ըստ որի բյուջեի եկամուտները 2026 թվականից կաճեն միջինում տարեկան 2.1 տոկոսով, իսկ ծախսերը իրական արտահայտմամբ ավելի քան կրկնապատկվելու են։