Դեկտեմբերի 11-ի կարևոր լուրերը

Ինչ է կատարվել Հայաստանում և աշխարհում

Փաշինյան․ Գերմանիայի դեսպանատանը վիզաների հերթեր չեն լինելու
Նիկոլ Փաշինյանը Համբուրգում հայտնել է, որ հաջորդ տարուց Գերմանիայի դեսպանատունը Հայաստանում վիզաների հերթեր չի ունենալու։ Վիզաների ստացման դյուրացումը եղել է ՀՀ–ԵՄ համագործակցության կարևոր ուղղություն, և այս քայլը կարող է շարունակություն ստանալ նաև այլ ԵՄ երկրներում։

Հայաստանի արտահանումը Գերմանիա աճել է ավելի քան 80%
Էկոնոմիկայի նախարար Գևորգ Պապոյանը հայտնել է, որ արտահանումը դեպի Գերմանիա աճել է 80%–ով՝ շնորհիվ արդյունաբերության զարգացման։ Կառավարությունը շարունակում է խթանել արտահանումը՝ փոխհատուցելով մաքսատուրքերը, որպեսզի հայկական արտադրանքը մրցունակ լինի եվրոպական շուկայում։

ԵԱՏՄ-ից դուրս գալը նպատակ չէ, ԵՄ անդամ դառնալը՝ նպատակ
Նիկոլ Փաշինյանը նշել է, որ Հայաստանը դեռ չի հասել այն կետին, երբ պետք է ընտրի ԵԱՏՄ–ից կամ ԵՄ–ից մեկը։ Սակայն ընդգծել է՝ ԵՄ անդամ դառնալը Հայաստանի ռազմավարական նպատակներից է։ Վարչապետը Համբուրգից մեկնելու է Մոսկվա՝ մասնակցելու ԵԱՏՄ միջկառավարական խորհրդի նիստին։

Հիփոթեքային սուբսիդիաները բազմազավակների համար ավելանում են 400 մլն դրամով
Կառավարությունը 20%–ով ավելացրել է ծրագրի ֆինանսավորումը՝ պայմանավորված դիմողների աննախադեպ աճով։ Այս տարի աջակցություն ստացել է ավելի քան 2,500 բազմազավակ ընտանիք։

Խուզարկություններ Արցախի ներկայացուցչությունում
Քննչական մարմինները խուզարկություններ են իրականացրել Արցախի ներկայացուցչությունում։ Աշոտ Դանիելյանը կարծիք է հայտնել, որ դա կապված է երեկվա լսումներին, որոնք վերաբերում էին արցախցիների վերադարձի հարցերին։

Մայր Աթոռը արձագանքում է 10 եպիսկոպոսների հայտարարությանը
Մայր Աթոռ Սուրբ Էջմիածինը ողջունում է եպիսկոպոսաց կոչը՝ հարգելու եկեղեցու նվիրապետական կարգը, սակայն ցավով արձանագրում է, որ հարաբերությունները փորձում են կարգավորել հրապարակային հայտարարություններով, այլ ոչ եկեղեցական մարմիններում։