Քրեական ոստիկաններն ապօրինի շրջանառությունից հանել են ավելին քան 4 կգ մեթամֆետամին, հերոին և դեղահաբեր

Ձերբակալված անձը կալանավորվել է:

Քրեական ոստիկանության ծառայողները Սյունիքի մարզում բացահայտել են առանձնապես խոշոր չափերի թմրամիջոցների ապօրինի շրջանառության դեպք։

Մարտի 16-ին իրականացված օպերատիվ միջոցառումների արդյունքում պարզվել է, որ օտարերկրացի 41-ամյա տղամարդը, նախնական պայմանավորվածությամբ իր 40-ամյա համերկրացու հետ, Մեղրի-Կապան ավտոճանապարհից վերցրել էր մաքսանենգ ճանապարհով Հայաստան ներկրված թմրամիջոցներ և ուղևորվում էր դեպի Երևան։

Նա հայտնաբերվել և ձերբակալվել է Կապանում, ապա տեղափոխվել Քրեական ոստիկանության Սյունիքի մարզային վարչություն։

Մեքենայում կատարված խուզարկությամբ հայտնաբերվել է երեք կիլոգրամից ավելի մեթամֆետամին, մեկ կիլոգրամից ավելի հերոին, ինչպես նաև 34 դեղահաբ։

Ձերբակալված անձը կալանավորվել է, իսկ քրեական վարույթի շրջանակում նախաքննությունը շարունակվում է։

Դեպքը համարվում է առանձնապես խոշոր չափերի թմրամիջոցների ապօրինի շրջանառության դեպք։