Սուրեն Գրիգորյանը ընդգծել է, որ վերապատրաստումից հետո կսկսվեն խիստ ստուգումներ հասարակական տրանսպորտում՝ ուղղված պոտենցիալ խախտողներին հայտնաբերելուն և տուգանելուն։

Երևանի փոխքաղաքապետ Սուրեն Գրիգորյանը անդրադարձել է հասարակական տրանսպորտում վերահսկողության կազմակերպմանը՝ նշելով, որ այդ լիազորությունները հանձնվել են հասարակական կարգի պահպանության ծառայությանը։

Նրա խոսքով՝ այս շաբաթվա ընթացքում կավարտվեն ծրագրային աշխատանքները, որոնք ներառում են ստուգումների իրականացման մեթոդաբանության մշակումը։ Այնուհետև հասարակական կարգի պահպանության ծառայության աշխատակիցների համար կկազմակերպվեն վերապատրաստման դասընթացներ, որոնց ընթացքում նրանց կներկայացվեն ստուգումների իրականացման գործընթացները և պահանջները։

Սուրեն Գրիգորյանը ընդգծել է, որ վերապատրաստումից հետո կսկսվեն խիստ ստուգումներ հասարակական տրանսպորտում՝ ուղղված պոտենցիալ խախտողներին հայտնաբերելուն և տուգանելուն։ Այս հարցի վերաբերյալ քաղաքապետ Տիգրան Ավինյանի հետ զրույցում փոխքաղաքապետը հաստատել է, որ առաջիկայում այս մեխանիզմի գործարկումն ակտիվ կլինի։

Այս քայլը նպատակ ունի բարելավել հասարակական տրանսպորտի կարգուկանոնը և ապահովել ուղևորների անվտանգ ու կանոնավոր սպասարկում։