Չինաստանն ԱՄՆ-ի հետ պատշաճ կերպով կլուծի TikTok-ի հարցը

Պեկինը մտադիր է համագործակցել ԱՄՆ-ի հետ TikTok հարթակի սեփականության հարցի լուծման շուրջ:

Այս մասին հայտարարել է Չինաստանի առևտրի նախարարությունը՝ ամփոփելով Բուսանում Չինաստանի նախագահ Սի Ծինփինի և ԱՄՆ նախագահ Դոնալդ Թրամփի բանակցությունները։

«Կողմերը նաև հաստատել են Մադրիդի առևտրային խորհրդակցությունների արդյունքները, ընդ որում ԱՄՆ-ը դրական պարտավորություններ է ստանձնել այնպիսի ոլորտներում, ինչպիսին է ներդրումները, իսկ Չինաստանը համաձայնել է ԱՄՆ-ի հետ պատշաճ կերպով լուծել TikTok-ի շուրջ հարցը», - ասվում է գերատեսչության կայքում տեղադրված հաղորդագրության մեջ։

Սեպտեմբերի 25-ին Թրամփը ստորագրել է հրամանագիր՝ հաստատելով մի գործարք, համաձայն որի չինական TikTok սոցիալական ցանցի գործունեությունն ԱՄՆ-ում կանցնի ամերիկյան բիզնեսի վերահսկողության տակ։ Ինչպես նշված է հրամանագրում, նոր կառույցում ամենամեծ բաժնեմասը և վերահսկողությունը կունենան ԱՄՆ քաղաքացիները։ Չինական ByteDance ընկերությունը կստանա 20%-ից պակաս բաժնեմաս, իսկ մնացած մասը կպատկանի «որոշակի ներդրողների»։ Թե կոնկրետ ովքեր, չի հստակեցվում։ Ընկերությունը կկառավարվի նոր տնօրենների խորհրդի կողմից՝ համաձայն այն կանոնների, որոնք «կապահովեն ամերիկացիների տեղեկատվության պատշաճ պաշտպանությունը» և ԱՄՆ անվտանգությունը։ Նոր ընկերության արժեքը կկազմի մոտ 14 միլիարդ դոլար։

Օրենքը, որը պարտավորեցնում է ByteDance-ին վաճառել սոցիալական ցանցը կամ դադարեցնել դրա գործունեությունը Միացյալ Նահանգների տարածքում, 2024 թվականին ստորագրվել է Ամերիկայի նախկին առաջնորդ Ջո Բայդենի կողմից։ Թրամփն ասել էր, որ լավ է վերաբերվում այդ հարթակին, քանի որ դրա օգտատերերի ձայները նպաստել են նախագահական ընտրություններում իր հաղթանակին։ 2025 թվականի հունվարի 20-ին երդմնակալությունից հետո նա հրամանագիր է ստորագրել, որի համաձայն հետաձգվել է Միացյալ Նահանգներում այդ հարթակի արգելափակումը։ Ավելի ուշ նա բազմիցս երկարաձգել է այդ հետաձգումը։ Վերջին անգամ նա դա արել է սեպտեմբերի 16-ին։ Սոցիալական ցանցի արգելափակումը ԱՄՆ-ում հետաձգվել է մինչև դեկտեմբերի 16-ը։ Սեպտեմբերին Թրամփը հայտարարել է, որ «մի շատ խոշոր ընկերությունների խումբ» ցանկանում է գնել TikTok-ը և տեղեկացրել է չինական կողմի հետ նախնական պայմանավորվածությունների առկայության մասին։