Չինաստանը 2025-ի նոյեմբերին բնական գազի ներմուծման նոր պատմական ռեկորդ է սահմանել

Խողովակաշարային գազը Չինաստան է մատակարարվում հինգ երկրից:

Չինաստանը 2025 թվականի նոյեմբերին ներմուծել է ընդհանուր առմամբ 17.488 մլրդ խմ բնական գազ, ինչը 16%-ով գերազանցում է նախորդ տարվա նույն ամսվա ցուցանիշը՝ 15.03 մլրդ խմ։ Այդ մասին հայտնել է ՉԺՀ-ի գլխավոր մաքսային վարչությունը։

Սա գազի ամսական ներմուծման նոր պատմական առավելագույն մակարդակ է։ Նախորդ ռեկորդը գրանցվել էր 2023 թվականի նոյեմբերին, երբ Չինաստանի ներմուծումը կազմել էր 16.449 մլրդ խմ։

Խողովակաշարային գազը Չինաստան է մատակարարվում հինգ երկրից՝ Ռուսաստանից, Ղազախստանից, Թուրքմենստանից, Ուզբեկստանից և Մյանմայից։ Ներմուծումների աճը հիմնականում պայմանավորված է Ռուսաստանի կողմից մատակարարումների ավելացմամբ «Սիբիրի ուժը» գազատարով։

Նախնական գնահատականներով՝ 2025 թվականի նոյեմբերին խողովակաշարային գազի մատակարարումները կազմել են շուրջ 6.7 մլրդ խմ, ինչը 16%-ով ավելի է 2024 թվականի նոյեմբերի մակարդակից՝ 5.741 մլրդ խմ։

Մատակարարման եղանակների (խողովակաշարային գազ և LNG) և առանձին մատակարարների վերաբերյալ մանրամասն վիճակագրությունը ՉԺՀ-ի մաքսային վարչությունը կհրապարակի հունվարի 18-ին և 20-ին։