Չինաստանը հունվարի 6-ից սահմանում է երկակի նշանակության ապրանքների արտահանման էմբարգո դեպի Ճապոնիա

ՉԺՀ-ն մի շարք սահմանափակող միջոցներ է կիրառել Ճապոնիայի նկատմամբ:

Չինաստանը հունվարի 6-ից էմբարգո է սահմանում դեպի Ճապոնիա երկակի նշանակության ապրանքների արտահանման վրա այն դեպքերում, երբ դրանք նախատեսված են ռազմական օգտագործման համար։ Այդ մասին հայտարարել է Չինաստանի Ժողովրդական Հանրապետության առևտրի նախարարության մամուլի ծառայությունը։

Հաղորդագրության համաձայն՝ արգելվում է երկակի նշանակության բոլոր ապրանքների արտահանումը ճապոնական ռազմական օգտագործողներին, ինչպես նաև ցանկացած այլ վերջնական օգտագործողի, եթե այդ ապրանքները կարող են նպաստել Ճապոնիայի ռազմական կարողությունների ամրապնդմանը։ Նախարարությունը պարզաբանել է, որ արգելքի խախտման դեպքում կազմակերպությունները և ֆիզիկական անձինք կենթարկվեն իրավական պատասխանատվության։

Չինաստանի և Ճապոնիայի հարաբերությունների սրացումը պայմանավորված է 2025 թվականի նոյեմբերին Ճապոնիայի վարչապետ Սանաե Տակաիչիի խորհրդարանական հայտարարությամբ, ըստ որի՝ Թայվանի շուրջ հնարավոր ռազմական ճգնաժամը կարող է դիտարկվել որպես Ճապոնիայի համար «էկզիստենցիալ սպառնալիք» և հիմք հանդիսանալ ռազմական ուժի կիրառման համար՝ կոլեկտիվ ինքնապաշտպանության իրավունքի շրջանակում։

Պեկինը այդ հայտարարությունը որակել է որպես միջամտություն ՉԺՀ ներքին գործերին և բացահայտ սպառնալիք։ Չինաստանի իշխանությունները պահանջել են Ճապոնիայի վարչապետից հերքել իր հայտարարությունը։

Ստեղծված իրավիճակի ֆոնին ՉԺՀ-ն մի շարք սահմանափակող միջոցներ է կիրառել Ճապոնիայի նկատմամբ, այդ թվում՝ տնտեսական բնույթի քայլեր, երկկողմ շփումների սահմանափակում և Չինաստանի քաղաքացիներին Ճապոնիա չայցելելու վերաբերյալ խորհուրդներ։

Պեկինի պաշտոնական դիրքորոշման համաձայն՝ Թայվանը Չինաստանի անքակտելի մասն է և հանդիսանում է ՉԺՀ տարածքներից մեկը։ Այս դիրքորոշումը, Չինաստանի ներկայացմամբ, ընդունվում է միջազգային հանրության մեծ մասի կողմից։