Չինաստանի տնտեսությունը դանդաղում է․ նոյեմբերի տվյալները ցածր են

Այս տվյալները հավելյալ ճնշում են ստեղծում Պեկինի համար՝ 19 տրիլիոն դոլար ծավալով տնտեսությունը կայուն պահելու ջանքերում:

Չինաստանի տնտեսական ակտիվությունը 2025թ. նոյեմբերին զգալիորեն թուլացել է։ Արդյունաբերական արտադրության աճը կազմել է 4.8% տարեկան կտրվածքով, ինչը ամենացածր ցուցանիշն է 2024թ. օգոստոսից ի վեր, և ցածր է սպասված 5.0% կանխատեսումից։ Միաժամանակ սպառումը չափող մանրածախ վաճառքներն աճել են ընդամենը 1.3%, մինչդեռ հոկտեմբերին աճը կազմել էր 2.9%, իսկ կանխատեսումները՝ շուրջ 2.8% էին։ Սա ամենացածր ցուցանիշն է 2022 թ. դեկտեմբերից հետո:

Այս տվյալները հավելյալ ճնշում են ստեղծում Պեկինի համար՝ 19 տրիլիոն դոլար ծավալով տնտեսությունը կայուն պահելու ջանքերում: Մինչ այժմ իշխանությունները հենվել են արտահանման վրա, սակայն շուրջ 1 տրիլիոն դոլարի հասնող առևտրային ավելցուկը հանգեցրել է միջազգային դժգոհության և ներմուծման նոր սահմանափակումների քննարկումների։ Իսկ դանդաղող ցուցանիշներն ուժեղացնում են կառուցվածքային բարեփոխումների անհրաժեշտության մասին խոսակցությունները Չինաստանում։