Չարլզ III-ը և Կամիլան ԱՄՆ-ում են՝ լարված հարաբերությունների ֆոնին

Սպիտակ տանը տեղի է ունեցել փակ ձևաչափով թեյախմություն

Մեծ Բրիտանիայի թագավոր Չարլզ III-ը և թագուհի Կամիլան ժամանել են Միացյալ Նահանգներ՝ քառօրյա պետական այցով։

Այցը տեղի է ունենում ԱՄՆ-ի և ՄԹ կառավարության միջև առկա լարվածության պայմաններում, որը կապված է Իրանի շուրջ զարգացումների հետ։

Թագավորական զույգը վայրէջք է կատարել «Էնդրյուս» համատեղ ավիաբազայում, որտեղից ուղևորվել է Սպիտակ տուն։ Նրանց դիմավորել են ԱՄՆ նախագահ Դոնալդ Թրամփը և առաջին տիկին Մելանյա Թրամփը։

Սպիտակ տանը տեղի է ունեցել փակ ձևաչափով թեյախմություն, որից հետո կողմերը մասնակցել են Վաշինգտոնում Մեծ Բրիտանիայի դեսպանի նստավայրի այգում կազմակերպված ընդունելությանը։

Նմանատիպ ձևաչափով ընդունելություն վերջին անգամ անցկացվել էր 1939 թվականին՝ Գեորգ VI թագավորի և Ելիզավետա թագուհու այցի ընթացքում։

Պետական այցը դիտարկվում է նաև որպես փորձ՝ մեղմելու անգլո-ամերիկյան հարաբերություններում առկա լարվածությունը։ Ավելի վաղ Դոնալդ Թրամփը նշել էր, որ այս այցը կարող է նպաստել երկկողմ հարաբերությունների կարգավորմանը։

Այցի շրջանակում Չարլզ III-ը ելույթ կունենա ԱՄՆ Կոնգրեսում՝ դառնալով պատմության մեջ երկրորդ բրիտանական միապետը, ով հանդես կգա այնտեղ։ Առաջինը եղել է Ելիզավետա II թագուհին՝ 1991 թվականին։

Այցի ավարտին թագավորական զույգը կմեկնի Նյու Յորք, որտեղ նախատեսված է մասնակցություն սեպտեմբերի 11-ի զոհերի հիշատակին նվիրված միջոցառմանը։