ԼՂ-ից տեղահանվածների բնակապահովման ծրագրում փոփոխություններ են կատարվել

Այս փոփոխությամբ մի շարք համայնքներում աջակցությունը կբարձրանա նախկին 3 մլն դրամից մինչև 4 մլն դրամ։

Կառավարությունը մարտի 26-ի նիստում փոփոխություններ է կատարել Լեռնային Ղարաբաղից տեղահանված ընտանիքների բնակապահովման պետական աջակցության ծրագրում։

Աշխատանքի և սոցիալական հարցերի նախարար Արսեն Թորոսյանի ներկայացմամբ՝ փոփոխությունները վերաբերում են ինչպես շահառուների շրջանակին, այնպես էլ աջակցության չափերին։

Նախատեսվում է, որ ընտանիքի անդամ կհամարվեն նաև մինչև 2026 թվականի դեկտեմբերի 31-ը ծնված երեխաները՝ անկախ դիմում ներկայացնելու ժամկետից։

Փոփոխությամբ ընդլայնվում է նաև հիփոթեքային աջակցության շրջանակը։ Այսուհետ ծրագրից կարող են օգտվել նաև այն անձինք, ովքեր մինչև 2025 թվականի հուլիսի 1-ը ստացել են ոչ թե դասական հիփոթեքային վարկ, այլ անշարժ գույքի գրավով սպառողական վարկ՝ վերաֆինանսավորման նպատակով։

Նոր կարգավորումներով, եթե շահառուն ցանկանում է աջակցության մնացորդը օգտագործել կահույքի կամ կենցաղային տեխնիկայի ձեռքբերման համար, գումարը կփոխանցվի անմիջապես վաճառողի բանկային հաշվին։

Միաժամանակ վերանայվել է աջակցության չափը։ Ընդլայնվել է այն բնակավայրերի ցանկը, որտեղ կգործի 4 մլն դրամ աջակցությունը․ դրանց թիվը կավելանա շուրջ 150-ով։

Այս փոփոխությամբ մի շարք համայնքներում աջակցությունը կբարձրանա նախկին 3 մլն դրամից մինչև 4 մլն դրամ։ Երևանում այն կմնա 3 մլն դրամ, իսկ որոշ սահմանամերձ համայնքներում՝ 5 մլն դրամ։

Նախարարի խոսքով՝ փոփոխությունները կազդեն շուրջ 25 հազար տեղահանված քաղաքացիների վրա և կարող են նաև խթանել բնակության վայրի ընտրության փոփոխությունը։