Հետվճարը՝ որպես կենսաթոշակների և նպաստների բարձրացման գործիք. այլընտրանքային մեխանիզմ

Ծրագրերը նպատակ ունեն խթանել անկանխիկ շրջանառությունը:

Աշխատանքի և սոցիալական հարցերի նախարար Արսեն Թորոսյանը սոցցանցերում հրապարակված տեսանյութում ներկայացրել է անկանխիկ վճարումների միջոցով հետվճար ստանալու և դրա հաշվին կենսաթոշակների ու նպաստների փաստացի ավելացման հնարավորությունները։

Նախարարը նշել է, որ հունվարի 1-ից փոփոխվել է հետվճարի չափը․ այն սահմանվել է 20 տոկոս՝ մինչև առավելագույնը 10 հազար դրամի սահմանաչափով։ Այդ մեխանիզմը վերաբերում է կենսաթոշակառուներին և նպաստառուներին և գործում է ՀՀ-ում գործող առևտրի կետերում անկանխիկ վճարումներ կատարելու դեպքում։

Միաժամանակ ներկայացվել է նաև առանձին ծրագիր, որը վերաբերում է բոլոր քաղաքացիներին։ Այն նախատեսում է 2 տոկոս հետվճար անկանխիկ գնումների դեպքում, սակայն կիրառելի է բացառապես ArCa վճարային համակարգի քարտերով իրականացված գործարքների համար։

Նախարարի խոսքով՝ այն կենսաթոշակառուներն ու նպաստառուները, որոնք իրենց վճարային քարտերը փոխարինեն ArCa քարտերով, կարող են միաժամանակ օգտվել երկու մեխանիզմներից և ստանալ ոչ թե 20, այլ ընդհանուր առմամբ 22 տոկոս հետվճար։

Ծրագրերը նպատակ ունեն խթանել անկանխիկ շրջանառությունը և բարձրացնել սոցիալական վճարների փաստացի օգտագործման արդյունավետությունը։