Սննդամթերքի անվտանգության տեսչական մարմնի տեսուչները վերահսկողական միջոցառումներ են իրականացրել Կոտայքի մարզի Ծաղկաձոր քաղաքի «Ռիպա» հյուրանոցի խոհանոցում։
ՍԱՏՄ-ի փոխանցմամբ՝ ստուգման արդյունքում արձանագրվել են սննդամթերքի անվտանգության պահանջներին չհամապատասխանող մի շարք խախտումներ։ Մասնավորապես՝ խոհանոցի պատերը չեն ունեցել հարթ մակերես և չեն գտնվել պատշաճ նորոգ վիճակում, իսկ սննդամթերքի հետ անմիջական շփման մեջ գտնվող սարքավորումների մակերևույթները նույնպես չեն համապատասխանել սահմանված պահանջներին։
Հայտնաբերված խախտումների հիմքով՝ խոհանոցի արտադրական գործունեությունը կասեցվել է։
Ընկերության տնօրենին հանձնարարվել է ձեռնարկել անհրաժեշտ միջոցներ՝ սննդի կառույցը օրենսդրության պահանջներին համապատասխանեցնելու համար։
Խախտումները վերացնելու համար սահմանվել է ժամկետ։
