Բիզնեսը պահանջում է մաքսատուրքերի վերադարձ․ ԱՄՆ Գերագույն դատարանի վճիռը վճռորոշ է լինելու

ԱՄՆ Գերագույն դատարանը քննություն է վարելու մի շարք հայցերով:

Դոնալդ Թրամփի սահմանած բարձր մաքսատուրքերը շարունակում են ծանր ճնշում գործադրել ԱՄՆ փոքր ու միջին բիզնեսների վրա։ The Washington Post-ի հաղորդմամբ՝ մանկական պարագաների արտադրող Բեթ Բենիկեի ընկերությունը գրեթե կաթվածահար է եղել այն պահից, երբ Չինաստանից ներկվող ապրանքների համար սահմանվեց 145 տոկոս մաքսատուրք։ Ապրիլին նա ստիպված է եղել երկու ամսով դադարեցնել ներկրումները, իսկ տուրքը 30 տոկոսի իջեցումից հետո անգամ վճարել է ավելի քան 40 հազար դոլարի հավելյալ վճարներ, ինչը լուրջ հարված է եղել բիզնեսին։

Առաջիկայում ԱՄՆ Գերագույն դատարանը քննություն է վարելու մի շարք հայցերով, որոնցում ընկերությունները պահանջում են վերադարձնել բարձր տուրքերով արդեն վճարված գումարները՝ պնդելով, որ դրանք սահմանվել են իրավական պահանջների խախտմամբ։ Վճիռը կարող է ունենալ լայն ազդեցություն․ այն առնչվում է հազարավոր բիզնեսների ֆինանսական բեռին և կարող է վերաձևել նախագահի դերը միջազգային առևտրի քաղաքականության մեջ։