Օգոստոսի 26-ի բիզնես լուրերը

Տեղական

▪️ Էկոնոմիկայի նախարարի այցը Սյունիք

ՀՀ էկոնոմիկայի նախարարը Սյունիքի մարզում ծանոթացել է կառավարության ենթակառուցվածքային ծրագրերի ընթացքին։ Գորիսում ներկայացվել են «Հայաստանի զբոսաշրջության և մարզային ենթակառուցվածքի ծրագրի» շրջանակում զբոսաշրջային կլաստերի ձևավորման աշխատանքները։ Նախարարը նաև այցելել է սահմանամերձ գյուղեր՝ ծանոթանալու բնակարանային ապահովության պետական աջակցության ծրագրի արդյունքներին, որով տրամադրվում է շուրջ 16 մլն դրամ անհատական բնակելի տներ կառուցելու համար։

▪️ Էրդողանի ակնկալիքները Թուրքիա–Ադրբեջան–Հայաստան համագործակցության մասին

Թուրքիայի նախագահ Ռեջեփ Թայիփ Էրդողանը հայտարարել է, որ Իգդիր-Արալըք-Դիլուջու երկաթուղու ավարտից հետո Թուրքիայի, Ադրբեջանի և Հայաստանի տնտեսական համագործակցությունը կմտնի նոր փուլ։ Նա վստահեցրել է, որ 224 կմ երկարությամբ երկաթուղին խթան կհանդիսանա տարածաշրջանի զարգացման համար։

▪️ Երեխա ունեցող ընտանիքների բնակարանային աջակցությունը

2025թ․-ին 1 մլրդ 650 մլն դրամ հատկացվել է 2046 շահառու ընտանիքների՝ բնակարանային ապահովության պետական աջակցության ծրագրի շրջանակում։ Ծրագրի մեկնարկից ի վեր աջակցություն է ստացել 14,167 ընտանիք՝ ընդհանուր 10 մլրդ 264 մլն դրամի չափով։

▪️ ԵԱՏՄ-ի արդյունաբերական առաջընթացը

Եվրասիական տնտեսական հանձնաժողովի արդյունաբերության և ագրոարդյունաբերության նախարար Գոհար Բարսեղյանը նշել է, որ ԵԱՏՄ-ն առաջընթաց է գրանցում արդյունաբերության և ագրոարդյունաբերության ռազմավարական նպատակների իրականացման գործում։

Միջազգային

▪️ Ռուսաստանում բանկային քարտերի սահմանափակում

Ռուսաստանի քաղաքացիները այլևս չեն կարող ունենալ 10-ից ավելի բանկային քարտ։ Որոշումը կայացվել է կիբերխարդախությունների դեմ միջոցառումների երկրորդ փաթեթի շրջանակում։

▪️ Nvidia-ի բանակցությունները ԱՄՆ-ի հետ

Nvidia-ն բանակցում է ԱՄՆ իշխանությունների հետ՝ Չինաստան նոր չիպերի մատակարարման հնարավորության շուրջ։ Ավելի վաղ Չինաստանը սահմանափակել էր H20 չիպերի կիրառումը պետական ու անվտանգության ոլորտներում։

▪️ Hyundai-ի ներդրումները ԱՄՆ-ում

Hyundai Motor Group-ը 2025-2028 թթ․ նախատեսում է ԱՄՆ-ում ներդրումները հասցնել մինչև 26 մլրդ դոլարի՝ կառուցելով մետալուրգիական և ռոբոտաշինական գործարաններ։ Ծրագիրը կստեղծի շուրջ 25 հազար աշխատատեղ։

▪️ Մասկի դատական հայցը Apple-ի և OpenAI-ի դեմ

Իլոն Մասկի xAI և X ընկերությունները դատի են տվել Apple-ին և OpenAI-ին՝ մեղադրելով անբարեխիղճ մրցակցության և մենաշնորհային դիրքի պահպանման մեջ։

Հետաքրքիր

▪️ Երաշտը Հայաստանում և Վրաստանում

Եվրոպական երաշտի դիտարանի տվյալներով՝ Հայաստանի և Վրաստանի տարածքի շուրջ 97%-ը գտնվում է երաշտի ազդեցության տակ։ Տուժած է տարածաշրջանների կեսից ավելին։