«Հայաստանը և Եվրոպան. Արմատներ և հեռանկարներ» բիզնես նախաճաշը կրկին համախմբեց եվրոպական դիվանագիտությունը և գործարար համայնքը

Կոմիտասի թանգարան-ինստիտուտում տեղի է ունեցել «Հայաստանը և Եվրոպան. Արմատներ և հեռանկարներ» խորագրով մշակութային աշխատաժողովը, որը միավորել է եվրոպական երկրների դեսպաններին, Հայաստանում գործող բիզնես կառույցների ղեկավարներին, տնտեսական ատաշեներին և գործարար համայնքի շուրջ 100 ներկայացուցիչների։

Աշխատաժողովը կազմակերպվել է արդեն չորրորդ անգամ՝ «Գալաքսի» ընկերությունների խմբի և Հայաստանում Եվրոպական բիզնես ասոցիացիայի նախաձեռնությամբ։ Այն ձևավորվել է որպես ավանդական «բիզնես նախաճաշ» ձևաչափով հանդիպում, որի ընթացքում ԵՄ դեսպաններն ու բիզնես համայնքի ներկայացուցիչները քննարկում են տնտեսական և մշակութային համագործակցության, ներդրումների և փոխգործակցության հնարավորությունները։

«Այսօր բիզնեսն ավելին է, քան թվերն ու պայմանագրերը։ Այն ինքնության մասին է՝ ով ենք մենք և ինչ միջոցներով ենք կապվում միմյանց։ Ժամանակակից աշխարհում հաջողությունը կախված է կապերից, մարդկանցից և մշակույթից։ Ահա թե ինչու նման միջոցառումները մեծ նշանակություն ունեն․ դրանք օգնում են մեզ միավորել ոչ միայն բիզնեսի հնարավորությունները, այլև մշակութային փոխըմբռնման ընդհանուր արժեքները։ Հայաստանը ճանաչում և զգում է Եվրոպայի մշակութային ոգին, իսկ Եվրոպան ավելի ու ավելի է գիտակցում հայկական ներուժի ստեղծագործական տոկունությունը»,- նշել է «Գալաքսի» ընկերությունների խմբի համահիմնադիր և գլխավոր տնօրեն Արամ Խաչատրյանը։

Այս տարվա միջոցառմանը իրենց երկրների տնտեսական և ներդրումային հնարավորություններն են ներկայացրել Հայաստանում Հունաստանի դեսպան Խրիստոս Սոֆիանոպուլոսը, Իտալիայի դեսպան Ալեսսանդրո Ֆերրանտին և Ռումինիայի դեսպան Կորնել Իոնեսկուն։ «Գալաքսի» ընկերությունների խմբի համահիմնադիր, կառավարման խորհրդի համանախագահ Արտյոմ Խաչատրյանը ներկայացրել է ընկերության տնտեսական ազդեցության ցուցանիշները և եվրոպական բրենդների ներկայությունը խմբի էկոհամակարգում։

Պաշտոնական բացումը կատարել է Հայաստանում ԵՄ պատվիրակության ղեկավար, արտակարգ և լիազոր դեսպան Վասիլիս Մարագոսը։ Դեսպանը իր խոսքում անդրադարձել է Հայաստան–ԵՄ առևտրաշրջանառության կայուն աճին՝ ընդգծելով, թե որքան կարևոր է մրցունակ և բարելավվող բիզնես միջավայրը՝ տնտեսական համագործակցության իրական ներուժը բացահայտելու համար։

Բացման տեսաուղերձով հանդես է եկել Հայաստանում Եվրոպական բիզնես ասոցիացիայի գործադիր տնօրեն Դիանա Սարումովան: 

«Այս հանդիպումը նշանակալի է մեզ համար։ Այն, տարիներ շարունակ կրկնվելով, վերածվել է ավանդույթի։ Սա այն հարթակն է, որն ուժեղացնում է համայնքի միասնականության զգացողությունը և հիշեցնում, թե ինչպիսի ձեռքբերումների կարող ենք հասնել, եթե դիվանագիտական և գործարար ջանքերը միավորենք մեկ սեղանի շուրջ։ Շնորհակալ ենք Եվրոպական միության դեսպաններին, որոնց գաղափարներն ու նախաձեռնությունները մեծապես նպաստում են ԵՄ իրազեկվածության բարձրացմանը Հայաստանում, կապերի ամրացմանը և եվրոպական արժեքների խթանմանը»,- նշել է ԵԲԱ գործադիր տնօրեն Դիանա Սարումովան։

Հատկանշական է, որ այս տարի միջոցառման անցկացման վայրն ընտրվել էր Կոմիտասի թանգարան-ինստիտուտը՝ նպատակ ունենալով ընդգծելու բիզնեսի, դիվանագիտության և մշակույթի փոխկապակցվածությունը։ Կոմիտասի ժառանգության ներկայացումը հնարավորություն է տվել հյուրերին ավելի խորությամբ ընկալելու հայկական մշակութային արմատները, որոնք հետևողականորեն կապված են եվրոպական մշակութային ավանդույթի հետ։ Հյուրերը մասնակցել են հատուկ կազմակերպված շրջայցի և կոմիտասյան մոտիվներով ժամանակակից բալետային ներկայացման՝ Արման Բալմանուկյանի պարային նախագծի շրջանակում, որի կուլմինացիան  եղել է Կոմիտաս վարդապետի «Անտունի» ստեղծագործության կենդանի կատարումը՝ դաշնակահար Կատարինե Հովսեփյանի և տենոր Հայկ Վարդանյանի մասնակցությամբ։ Միջոցառման կոնցեպտը մշակել է «ԱքսելՄոնդրիան» հաղորդակցական ընկերությունը՝ եվրոպական ցանցի անդամ, միջազգային որակավորված կազմակերպություն։

«Գալաքսի» ընկերությունների խումբըհիմնադրվել է Արամ, Գուրգեն և Արտյոմ Խաչատրյանների կողմից և այժմ ներկայացնում է 15 ընկերություն երեք երկրում։ Վերջին տարիներին կազմակերպությունը իրականացրել է ավելի քան 64 խոշոր սոցիալական պատասխանատվության ծրագիր, որոնց ուղիղ շահառուներ են դարձել ավելի քան 10,000 քաղաքացիներ։

Եվրոպական բիզնես ասոցիացիանհիմնադրվել է 2015թ․՝ Հայաստանում ԵՄ պատվիրակության աջակցությամբ։ Այն միավորում է եվրոպական բիզնես համայնքը, նպաստում է Հայաստանում գործարար միջավայրի բարելավմանը, օտարերկրյա ներդրումների ներգրավմանը և Հայաստանի ու Եվրամիության միջև տնտեսական կապերի խորացմանը։

*գովազդ