Բրազիլիայի Գերագույն դատարանը Ժաիր Բոլսոնարուին դատապարտել է 27 տարվա ազատազրկման. Reuters

Բրազիլիայի Գերագույն դաշնային դատարանը նախկին նախագահ Ժաիր Բոլսոնարուին մեղավոր է ճանաչել 2022 թվականի ընտրությունում պարտվելուց հետո իշխանությունը պահպանելու նպատակով պետական հեղաշրջում կազմակերպելու համար։ Սա նշանակալի որոշում է համարվում, քանի որ երկրի պատմության մեջ նա առաջին նախկին նախագահն է, որը դատապարտվում է ժողովրդավարության հանդեպ ոտնձգության համար, գրում է Reuters-ը։

Բոլսոնարուն մեղավոր է ճանաչվել զինված հանցավոր կազմակերպություն ղեկավարելու, ժողովրդավարական իրավունքի գերակայությունը բռնի տապալելու փորձի, պետական հեղաշրջում կազմակերպելու և դաշնային սեփականությանն ու պաշտպանված մշակութային արժեքներին վնաս պատճառելու համար։

Նախկին նախագահը դատապարտվել է 27 տարի 3 ամիս ազատազրկման, այդ թվում՝ 24 տարի 9 ամիս ազատազրկման և 2 տարի 6 ամիս կալանքի, ինչպես նաև 124 օր տուգանքի:

Դատական կոլեգիայի չորս դատավոր քվեարկել է դատապարտման օգտին, մեկը՝ արդարացման։ Որոշումը խոր հարված է հասցնում ծայրահեղ աջ շարժմանը, որին Բոլսոնարուն օգնել է ակտիվանալ, բացի այդ, Բրազիլիան հայտնվում է այն ժողովրդավարական երկրների ցուցակում, որոնք հայտնի գործիչներին պատասխանատվության են ենթարկում հակաժողովրդավարական գործողությունների համար: