ՀՀ սահմանային անցակետերում ընթացակարգերը օտարերկրացի վարորդների համար կպարզեցվեն

Փոփոխությունները կդարձնեն սահմանահատումն ավելի արագ, հարմարավետ և արդարացի՝ նպաստելով առևտրի և զբոսաշրջության զարգացմանը։

Կառավարությունն առաջարկում է օրենսդրական փոփոխություններ՝ Հայաստանի ցամաքային սահմանային անցակետերում առաջացող կուտակումները նվազեցնելու նպատակով։ Նախատեսվում է հետաձգել օտարերկրյա տրանսպորտային միջոցների համար սահմանված մի շարք հարկերի և տուրքերի վճարման ժամկետները։ Օրենսդրական փաթեթն ընդունվեց սեպտեմբերի 25-ի նիստին։ Այն դեռ պետք է հաստատի Ազգային ժողովը։

Փոփոխությունների հիմնական նպատակն է վերացնել այն պահանջը, որով վարորդները պարտավոր են բնապահպանական և ճանապարհային հարկերը վճարել անմիջապես սահմանը հատելիս, ինչը, ըստ գործադիրի, երկար հերթերի և ժամանակի կորստի պատճառ է դառնում։ Նախագծի համաձայն՝ օտարերկրյա տրանսպորտային միջոցների վարորդներին կտրվի մինչև 15 օր ժամանակ՝ վճարումները կատարելու համար երկրի տարածքում կամ մինչև ՀՀ տարածքից ելքը, եթե նրանց այցը ավելի կարճ է։

Բացի այդ, առաջարկվում է պարզեցնել ընթացակարգերը՝ վերացնելով սահմանին տարանցման հայտարարագրի համար գանձվող պետական տուրքը և միասնական դրույքաչափ սահմանելով բնապահպանական հարկի համար։

Նախագծով սահմանվում է նաև սոցիալական կարևոր արտոնություն. այն բեռնատարների վարորդները, որոնք ճանապարհի անանցանելիության պատճառով ստիպված են լինում իրենց կամքից անկախ 15 օրից ավելի մնալ Հայաստանում, կազատվեն այդ ժամանակահատվածի համար ճանապարհային հարկ վճարելու պարտավորությունից։ Ըստ գործադիրի՝ այս փոփոխությունները կդարձնեն սահմանահատումն ավելի արագ, հարմարավետ և արդարացի՝ նպաստելով առևտրի և զբոսաշրջության զարգացմանը։