ԲԸՏՄ ղեկավարն այցելել է Վեդու ջրամբար և FPWC-ի Ուրցաձորի կենդանիների ապաստարան

Բնապահպանության և ընդերքի տեսչական մարմնի ղեկավար Հովհաննես Մարտիրոսյանն աշխատանքային այցով եղել է Արարատի մարզում։ Այս մասին տեղեկացնում են ԲԸՏՄ-ից:

Ջրային ռեսուրսների օգտագործման և արդյունավետ կառավարման նպատակով շրջայց է կատարել Վեդիի նորակառույց ջրամբարի տարածքում, տեղում ծանոթացել ջրամբարի լցվածության աստիճանին, ջրառի կետում հետևել ջրի պահպանման ու բաշխման աշխատանքների ընթացքին։

Հ․ Մարտիրոսյանը հույս է հայտնել, որ համաշխարհային չափանիշներին համապատասխան՝ տեղայնացված արդի տեխնոլոգիաների կիրառմամբ ջրամբարը կնպաստի գյուղատնտեսության ու կենսաբազմազանության զարգացմանը, կենսամակարդակի բարձրացմանն ու կլիմայի փոփոխության դեմ պայքարին։

Մարզային այցի շրջանակներում ԲԸՏՄ ղեկավարը հետևել է Վայրի բնության և մշակութային արժեքների պահպանման հիմնադրամի (FPWC) Ուրցաձորի կենդանիների ապաստարանում պահվող անազատությունից փրկված վայրի կենդանիների խնամքին և պահման պայմաններին։ Հայաստանում անցկացվելիք COP17 համաժողովին ընդառաջ ձևավորված կոմիտեում քննարկվող առանց թույլտվության պահվող վայրի կենդանիներին վերաբերող խնդիրների հիմնալուծման նպատակով կարևորվել է հիմնադրամի հետ սերտ համագործակցությունը։