Պետական եկամուտների կոմիտեն (ՊԵԿ) հրապարակել է 2026 թվականի հունվար-հունիս ամիսների 1,000 խոշոր հարկ վճարողների ցանկը և նրանց կողմից վճարված հարկերի ու տուրքերի ցուցանիշները։
Ըստ ներկայացված տվյալների՝ Հայաստանում գործող առևտրային բանկերի կողմից 2026թ. առաջին կիսամյակում վճարված հարկերի ընդհանուր ծավալը կազմել է 116.16 մլրդ դրամ (շուրջ 316.9 մլն ԱՄՆ դոլար՝ ըստ 29/07/26թ. ԿԲ փոխարժեքի՝ 1 USD = 366.54 AMD): 2025թ. համադրելի ցուցանիշի համեմատ բանկային համակարգի հարկային մուտքերն աճել են 7.79%-ով կամ 8.39 մլրդ դրամով։
Առևտրային բանկերի կողմից մուծված հարկերը կազմել են 1,000 խոշոր հարկատուների ընդհանուր մուտքերի 10.47%-ը (նախորդ տարվա նույն ժամանակահատվածի 10.93%-ի դիմաց)։
Բանկային համակարգի առաջատարները
2026թ. հունվար-հունիս ամիսների արդյունքներով բանկային համակարգի առաջատարը Արդշինբանկն է, որը զբաղեցնում է նաև Հայաստանի խոշոր հարկատուների ընդհանուր ցուցակի 3-րդ հորիզոնականը։ Բանկի կողմից վճարված հարկերը կազմել են 33.60 մլրդ դրամ՝ արձանագրելով ամենամեծ աճն ինչպես ծավալային, այնպես էլ բացարձակ արժեքով (+5.64 մլրդ դրամ կամ +20.16%):
Երկրորդ տեղում է Ամերիաբանկը (ընդհանուր ցուցակի 6-րդ հորիզոնական)՝ 22.15 մլրդ դրամ հարկային մուտքերով (+3.50%): Եռյակը եզրափակում է ԱԿԲԱ Բանկը (ընդհանուր ցուցակի 18-րդ հորիզոնական)՝ 10.62 մլրդ դրամով (+25.53%):
ՀՀ առևտրային բանկերի հարկային ցուցանիշները (2026թ. հունվար-հունիս)
№ | Բանկ | Վճարված հարկեր (մլրդ դրամ) | Փոփոխությունը 2025թ. նկատմամբ (%) | Դիրքը 1000 խոշոր ցանկում |
1 | Արդշինբանկ | 33.60 | +20.16% | 3 |
2 | Ամերիաբանկ | 22.15 | +3.50% | 6 |
3 | ԱԿԲԱ Բանկ | 10.62 | +25.53% | 18 |
4 | Ինեկոբանկ | 8.03 | +0.73% | 21 |
5 | Կոնվերս Բանկ | 5.55 | +15.69% | 30 |
6 | Էվոկաբանկ | 5.49 | +34.72% | 31 |
7 | ԱյԴի Բանկ | 4.96 | +12.56% | 34 |
8 | ՎՏԲ-Հայաստան Բանկ | 4.65 | +39.76% | 37 |
9 | Հայէկոնոմբանկ | 4.20 | +22.67% | 43 |
10 | Արարատբանկ | 3.74 | +1.16% | 51 |
11 | Արմսվիսբանկ | 3.09 | +0.75% | 61 |
12 | ԱՄԻՕ Բանկ | 2.56 | -1.12% | 72 |
13 | Ֆասթ Բանկ | 2.29 | -11.96% | 82 |
14 | Մելլաթ Բանկ | 1.65 | +13.44% | 111 |
15 | Յունիբանկ | 1.56 | -63.64% | 117 |
16 | Արցախբանկ | 1.32 | +13.16% | 139 |
17 | Բիբլոս Բանկ Արմենիա | 0.70 | +8.74% | 290 |
Աճի և նվազման միտումները
Ամենաբարձր տոկոսային աճը գրանցել է ՎՏԲ-Հայաստան Բանկը՝ +39.76% (մուծել է 4.65 մլրդ դրամ): Զգալի աճ են արձանագրել նաև Էվոկաբանկը (+34.72%), ԱԿԲԱ Բանկը (+25.53%) և Հայէկոնոմբանկը (+22.67%):
Նվազում է արձանագրվել երեք բանկերում․ ամենակտրուկ անկումը գրանցվել է Յունիբանկի մոտ (-63.64%՝ 4.29 մլրդ դրամից նվազելով 1.56 մլրդ դրամի): Հարկային մուտքերի նվազում է արձանագրվել նաև Ֆասթ Բանկի (-11.96%) և ԱՄԻՕ Բանկի (-1.12%) մոտ:
Կառուցվածքային փոփոխություններ․ ի տարբերություն 2025 թվականի, երբ ցուցակում առանձին տողով ներկայացված էր Արդշինինվեստբանկը (2.43 մլրդ դրամ), 2026թ. ցուցակում այն առանձնացված չէ:
ՀՀ Կենտրոնական բանկ
Հայաստանի Հանրապետության Կենտրոնական բանկը 2026թ. հունվար-հունիս ամիսներին պետական բյուջե է վճարել 1.28 մլրդ դրամ հարկ, ինչը 2025թ. նույն ժամանակահատվածի համեմատ ավելի է 202.19 մլն դրամով կամ 18.78%-ով։ ԿԲ-ն խոշոր հարկատուների ընդհանուր ցանկում զբաղեցնում է 141-րդ հորիզոնականը։
