Ադրբեջանը հաստատել է Նախիջևանի Սահմանադրության փոփոխությունները․ հանվել են Մոսկվայի և Կարսի պայմանագրերի անվանումները

Փոփոխությունների համաձայն՝ Սահմանադրության նախաբանից հանվել են 1921 թվականի մարտի 16-ի Մոսկվայի պայմանագրի և 1921 թվականի հոկտեմբերի 13-ի Կարսի պայմանագրի անվանումները։

Ադրբեջանի նախագահ Իլհամ Ալիևը հաստատել է Նախիջևանի Ինքնավար Հանրապետության Սահմանադրության փոփոխությունները, որոնցով հանվել են 1921 թվականի Մոսկվայի և Կարսի պայմանագրերի հիշատակումները։ Այս մասին հայտնում են ադրբեջանական լրատվամիջոցները։

Փոփոխությունների համաձայն՝ Սահմանադրության նախաբանից հանվել են 1921 թվականի մարտի 16-ի Մոսկվայի պայմանագրի և 1921 թվականի հոկտեմբերի 13-ի Կարսի պայմանագրի անվանումները։

Սահմանադրությունում ներառվել է նոր՝ 3-1 հոդված, որով սահմանվում է, որ Նախիջևանի Ինքնավար Հանրապետությունում Ադրբեջանի նախագահի լիազոր ներկայացուցչությունը հանդիսանում է գործադիր մարմին և իրականացնում է նախագահի կողմից սահմանվող խնդիրները։ Լիազոր ներկայացուցիչը նշանակվում և ազատվում է Ադրբեջանի նախագահի կողմից և անմիջականորեն ենթարկվում է նրան։

Նոր՝ 28-1 հոդվածով սահմանվում են նաև Նախիջևանի Ինքնավար Հանրապետության Գերագույն Մեջլիսի արձակման հիմքերը։ Ըստ փոփոխության՝ այն կարող է արձակվել 31 պատգամավորի պահանջով կամ այն դեպքում, երբ Գերագույն Մեջլիսը չի կարողանում իրականացնել իր լիազորությունները։