Հայաստանի տնտեսական և ինստիտուցիոնալ վերափոխման դոկտրին, զբոսաշրջության զարգացում․ 5 կարևոր որոշում՝ Կառավարության նիստից

Կառավարության այսօրվա՝ հունվարի 8-ի նիստում ընդունվել են մի շարք առանցքային որոշումներ, որոնք վերաբերում են տնտեսության կառուցվածքային վերափոխմանը, ներդրումներին, կապիտալի շուկայի զարգացմանը և զբոսաշրջությանը։

Ներկայացնում ենք 5 կարևոր որոշում Կառավարությունից։

Հաստատվեց Հայաստանի տնտեսական և ինստիտուցիոնալ վերափոխման դոկտրինը

Կառավարությունը հաստատեց Հայաստանի տնտեսական և ինստիտուցիոնալ վերափոխման դոկտրինը, որը վարչապետ Նիկոլ Փաշինյանի խոսքով զարգացման ուղենիշ է։ Փաստաթուղթը նկարագրում է՝ որտեղ է գտնվում Հայաստանը այսօր և դեպի ուր է շարժվում՝ նոր տնտեսական պարադիգմի պայմաններում։ Վարչապետը նշեց, որ 2018-ից ի վեր տնտեսությունը աճել է ավելի քան 50%-ով, իսկ մեկ շնչին ընկնող ՀՆԱ-ն՝ շուրջ 2.4 անգամ։

Կապիտալի շուկան կդառնա տնտեսական աճի կարևոր շարժիչ

Վարչապետը հայտարարեց, որ հաջորդ փուլում տնտեսության զարգացման առանցքային գործոններից մեկը լինելու է կապիտալի շուկայի կայացումը։ Նշվեց, որ վերջին տարիներին կապիտալի շուկան ծավալներով աճել է առնվազն 3–4 անգամ, և Հայաստանը պատրաստվում է անցնել զարգացման նոր փուլ։

Հաստատվեց Զբոսաշրջության զարգացման 2026–2030 ռազմավարությունը

Կառավարությունը հաստատեց զբոսաշրջության զարգացման 2026–2030 թվականների ռազմավարական ծրագիրը։ Նախատեսվում է զարգացնել մշակութային, գաստրոնոմիական, արկածային, ագրո, բժշկական, կրոնական և MICE զբոսաշրջությունը։ 2030-ին նպատակ է դրվել ունենալ առնվազն 3 մլն ներգնա զբոսաշրջիկ, շուրջ 3.8 մլրդ դոլարի եկամուտ և ստեղծել լրացուցիչ 20 հազար աշխատատեղ։

Ներդրումային ծրագրերով մի շարք ընկերություններ ազատվեցին մաքսատուրքից

Կառավարությունը մաքսատուրքից ազատեց միանգամից չորս ընկերությունների («ԼԵՔՍ ՏՈԲԱԿՈ ՔՈՄՓԱՆԻ», «ՍԱՆ ՖՈՒԴ», «ԳՌՕՄ», «ՍՈՎԹ ՊԱՊԻՐՈՒՍ»)՝ արտադրական հումքի ներմուծման համար։ Ծրագրերը ներառում են տասնյակ միլիարդ դրամների ներդրումներ, նոր աշխատատեղերի ստեղծում և աշխատավարձերի բարձրացում տարբեր ոլորտներում՝ սննդարդյունաբերությունից մինչև հիգիենայի պարագաների արտադրություն։

Կոտայքում կկառուցվի ժամանակակից ջերմոցային համալիր՝ վարդերի արտադրությամբ

Կառավարությունը մաքսատուրքից ազատեց նաև «ՌՈԶԵԼԻՆ ԲԱՅ ԿՕԿ» ՍՊԸ-ին, որը Կոտայքի մարզի Ակունք համայնքում կկառուցի ժամանակակից ջերմոցային համալիր։ Ծրագրի շրջանակում նախատեսվում է շուրջ 1.9 մլրդ դրամի ներդրում և մինչև 2028 թվականը ստեղծել 30 նոր աշխատատեղ։ Արտադրանքը նախատեսվում է իրացնել ինչպես տեղական, այնպես էլ արտաքին շուկաներում։