Հայաստանի և Ադրբեջանի նախաստորագրած խաղաղության համաձայնագիրը զգալի աշխարհաքաղաքական հետևանքներ ունի Կենտրոնական Ասիայի համար. ԱՄՆ սենատոր

Հայաստանի և Ադրբեջանի միջև խաղաղության համաձայնագիրը կարևոր աշխարհաքաղաքական նշանակություն ունի Կենտրոնական Ասիայի համար: Այս մասին Սենատի արտաքին հարաբերությունների կոմիտեում լսումների ժամանակ հայտարարել է ԱՄՆ սենատոր Սթիվ Դեյնսը՝ նշելով, թե ԱՄՆ հակառակորդները փորձում են խաթարել Վաշինգտոնի աճող ներգրավվածությունը տարածաշրջանում:

«Նախագահ Դոնալդ Թրամփի մասնակցությամբ Ադրբեջանի և Հայաստանի միջև նախաստորագրված բեկումնային խաղաղության համաձայնագիրը զգալի աշխարհաքաղաքական հետևանքներ ունի Կենտրոնական Ասիայի համար»,- ընդգծել է Դեյնսը։

Սենատորը նշել է, որ Միացյալ Նահանգները  «շրջում է նախորդ վարչակազմի էջը»՝ կենտրոնանալով իրական ներդրումների և Կենտրոնական Ասիայի պետությունների հետ ավելի սերտ համագործակցության վրա:

Ըստ Սթիվ Դեյնսի, կենտրոնասիական երկրների հետ ամուր հարաբերությունների հաստատումը կարևոր է ԱՄՆ ազգային անվտանգության և ռազմավարական կարևոր տարածաշրջանում դիրքերի ամրապնդման համար: