Հայաստանը 175 մլն դրամով միջազգային աճուրդում կգնի 1188 թվականին քանդակված դռան փեղկը և կբերի Հայաստան

Դռան փեղկը ներկայումս գտնվում է Մեծ Բրիտանիայի Լոնդոն քաղաքում Սէմ Ֆոգի պատկերասրահում:

Կառավարությունն իր այսօրվա՝ դեկտեմբերի 18–ի նիստում որոշեց պահուստային ֆոնդից ԿԳՄՍ նախարարությանը հատկացնել 175 մլն 360 հազար դրամ՝ որը կուղղվի Լոնդոնի միջազգային աճուրդում վաճառվող հայկական բացառիկ մշակութային արժեքի՝ 1188 թվականին պատրաստված և քանդակված փայտյա դռան փեղկի ձեռքբերմանը և Հայաստան տեղափոխմանը։

Հիմնավորման մեջ նշվում է, որ ի տարբերություն հայկական ճարտարապետության, քանդակագործության, մանրանկարչության և գորգագործության ստեղծագործությունների՝ միջնադարյան հայկական փայտագործության բավականին քիչ օրինակներ են պահպանվել: Հայկական փայտագործության ամենամեծ թվով նմուշները մեզ են հասել զարդանախշված եկեղեցական դռների տեսքով: Մինչև 1990-ական թվականները հայտնի էր միայն ութ նման կտոր: Փայտի փորագրության արվեստի ևս մեկ նմուշ շրջանառության մեջ է դրվել 1985թ-ին:

Նկարագրված մշակութային արժեք ներկայացնող դռան փեղկը ներկայումս գտնվում է Մեծ Բրիտանիայի Լոնդոն քաղաքում Սէմ Ֆոգի պատկերասրահում: Հաշվի առնելով նկարագրված փեղկի արժեքավոր նշանակությունը Հայաստանի, հայ մշակույթի և կրոնի համար՝ որոշվել է ձեռք բերել փեղկը և տեղափոխել այն Հայաստան: Հայաստան տեղափոխելուց հետո արժեքը կցուցադրվի Հայաստանի պատմության թանգարանում։

Արժեքի ձեռքբերման համար բրիտանական պատկերասրահը առաջարկել է վաճառքի գին՝ 330.0 հազար ֆունտ ստերլինգ (մոտ 165.0 մլն դրամ): Պետք է կատարվեն նաև տեղափոխման և ապահովագրության ծախսեր: Ընդհանուր անհրաժեշտ հատկացումը կազմում է 175,360.0 հազար դրամը, որը կհատկացվի Մշակույթի զարգացման հիմնադրամին և վերջինիս կողմից կապահովվեն բոլոր գործարքները: