Հայաստան–Թուրքիա սահմանին նախատեսվում է կամուրջների և մաքսային տերմինալների կառուցում

Ենթակառուցվածքային զարգացումներ կարող են լինել նաև Իջևան–Ղազախ հատվածում։

ՀՀ վարչապետ Նիկոլ Փաշինյանը հայտարարել է, որ Հայաստան–Թուրքիա սահմանին նախատեսվում են ենթակառուցվածքային խոշոր ծրագրեր՝ կամուրջների, մաքսային և սահմանային տերմինալների կառուցմամբ։

«Հայաստանը և խաղաղությունը ռիսկերի ու հնարավորությունների խաչմերուկում» խորագրով քննարկման ընթացքում վարչապետը նշել է, որ առնվազն Մարգարայում անհրաժեշտ է կառուցել կամուրջ, ինչպես նաև Ախուրիկում և Երասխում՝ մաքսային և սահմանային տերմինալներ։

Փաշինյանի խոսքով՝ ենթակառուցվածքային զարգացումներ կարող են լինել նաև Իջևան–Ղազախ հատվածում, որտեղ, նրա գնահատմամբ, առկա է որոշակի առաջընթացի հավանականություն։

Վարչապետը նշել է, որ նախատեսվում է նաև Հայաստան–Թուրքիա սահմանային հատվածում էլեկտրահաղորդման գծերի վերազինում։ Նրա խոսքով՝ ներկայում օգտագործվում են դեռևս խորհրդային ժամանակաշրջանից պահպանված ենթակառուցվածքներ, որոնք չեն համապատասխանում ժամանակակից պահանջներին։

Փաշինյանի ընդգծմամբ՝ նշված ծրագրերը դիտարկվում են տարածաշրջանային հաղորդակցությունների բացման և խաղաղության օրակարգի շրջանակում՝ տնտեսական և լոգիստիկ հնարավորությունների ընդլայնման համատեքստում։