Հայաստանը կվճարի 7.5 մլն դոլար՝ դառնալու Ենթակառուցվածքային ներդրումների ասիական բանկի (ԵՆԱԲ) անդամ

Կառավարությունը սեպտեմբերի 11-ի նիստում հաստատեց Հայաստանի անդամակցությունը Ենթակառուցվածքային ներդրումների ասիական բանկին (ԵՆԱԲ)՝ վճարելով 7.5 մլն դոլար։

ԵՆԱԲ-ը, որը հիմնադրվել է Չինաստանի նախաձեռնությամբ 2015-ին, այսօր ունի 106 անդամ պետություն և նպատակ ունի զարգացնել Ասիա-խաղաղօվկիանոսյան տարածաշրջանի ենթակառուցվածքները։ Բանկի կանոնադրական կապիտալը կազմում է 100 միլիարդ դոլար, որից 20 միլիարդը վճարված բաժնեմասեր են, իսկ 80 միլիարդը՝ ցպահանջ։

ԵՆԱԲ-ին ՀՀ բաժանորդագրության գործընթացը նախատեսում է բաժանորդագրում բանկի բաժնետիրական կապիտալի բաժնեմասերին՝ վճարվող և ցպահանջ բաժնեմասերի միջոցով: Մեկ բաժնեմասի արժեքը 100 հազ. ԱՄՆ դոլար է: 2017թ. Հայաստանը դիմում-հայտ է ներկայացրել Բանկին, որով Հայաստանի բաժանորդագրությունը Բանկին նախատեսվում էր 374 բաժնեմասի բաժանորդագրմամբ:

Հայաստանը դեռևս 2017-ին դիմել էր անդամակցելու համար, և այժմ մեր երկրի բաժանորդագրությունը սահմանվել է առավելագույնը 374 բաժնեմասի, որոնցից 299-ը ցպահանջ են։ Մնացած 75 բաժնեմասի արժեքը՝ 7.5 մլն դոլար, Հայաստանը պետք է վճարի 5 տարում՝ տարեկան 1.5 մլն դոլարով։