Հայաստանն իր ցուցանիշներով շատ մոտ է ԵՄ-ին անդամակցելու ձգտում ունեցող Արևմտյան Բալկանների երկրներին. Մարագոս

Հայաստանը գտնվում է այդ երկրների միջին ցուցանիշներին շատ մոտ մակարդակում։

ՀՀ-ում Եվրոպական միության դեսպան Վասիլիս Մարագոսը հայտարարել է, որ Հայաստանը իր ցուցանիշներով շատ մոտ է Եվրոպական միությանն անդամակցելու ձգտում ունեցող Արևմտյան Բալկանների երկրներին՝ ունենալով նաև ավելիին հասնելու ներուժ։

«Հայաստանը և խաղաղությունը ռիսկերի ու հնարավորությունների խաչմերուկում» խորագրով քննարկման ընթացքում դեսպանը նշել է, որ 2025 թվականի դեկտեմբերին ԵՄ-ն Հայաստանի Ազգային ժողովին և Կառավարությանը ներկայացրել է համեմատական ուսումնասիրություն, որտեղ Հայաստանը առաջին անգամ համադրվել է ԵՄ-ին անդամակցելու գործընթացում գտնվող Արևմտյան Բալկանների երկրների հետ։

Մարագոսի խոսքով՝ ուսումնասիրության արդյունքները ցույց են տալիս, որ Հայաստանը գտնվում է այդ երկրների միջին ցուցանիշներին շատ մոտ մակարդակում․ որոշ ոլորտներում՝ առաջանցիկ, որոշներում՝ հետ մնացող, սակայն ընդհանուր առմամբ ունի զարգացման զգալի պոտենցիալ։

Դեսպանը հավելել է, որ ներկայումս Հայաստանը և Եվրոպական միությունը ակտիվորեն աշխատում են գործընկերության ռազմավարական օրակարգի իրականացման ուղղությամբ, որը հաստատվել է 2025 թվականի դեկտեմբերի 2-ին Բրյուսելում կայացած ԵՄ–Հայաստան գործընկերության խորհրդի նիստի արդյունքում։

Նրա խոսքով՝ նշված օրակարգը հանդիսանում է Հայաստան–ԵՄ հարաբերությունների խորացման գործնական ճանապարհային քարտեզ։