Հայաստանը թևակոխել է խաղաղության, ժողովրդավարական ռեժիմի համախմբման նոր շրջան․ Անտոնիու Կոշտա

Սա հստակ ազդակ է այն մասին, թե ինչպես է ԵՄ-ն ցանկանում կառուցել հարաբերությունները Հայաստանի հետ:

ՀՀ-ն թևակոխել է խաղաղության, ժողովրդավարական ռեժիմի համախմբման նոր շրջան, և սա, անկասկած, բարենպաստ միջավայր է ստեղծում մեր երկկողմ հարաբերությունների զարգացման համար: Այս մասին  ՀՀ-ԵՄ առաջին գագաթնաժողովի ժամանակ ասել է Եվրոպական խորհրդի նախագահ Անտոնիու Կոշտան:

«Թույլ տվեք ԵՄ-ի անունից ևս մեկ անգամ շնորհակալություն հայտնել ձեզ ջերմ հյուրընկալության համար: Երեկ մենք ապրեցինք պատմական շատ կարևոր պահ, երբ առաջին անգամ Հայաստանում տեղի ունեցավ Եվրոպական քաղաքական համայնքի գագաթնաժողովը: Այսօր տեղի է ունենում երկրորդ կարևոր պատմական իրադարձությունը՝ պատմության մեջ առաջին գագաթնաժողովը Եվրոպական միության և Հայաստանի միջև:

Սա հստակ ազդակ է այն մասին, թե ինչպես է ԵՄ-ն ցանկանում կառուցել հարաբերությունները Հայաստանի հետ: Հայաստանը թևակոխել է խաղաղության, ժողովրդավարական ռեժիմի համախմբման նոր շրջան, և սա, անկասկած, բարենպաստ միջավայր է ստեղծում մեր երկկողմ հարաբերությունների զարգացման համար: ԵՄ-Հայաստան գործընկերության ռազմավարական օրակարգն ընդունվել է անցյալ տարվա հոկտեմբերին, և այդ ժամանակից ի վեր մենք ամրապնդում ենք և շարունակում ենք ամրապնդել մեր կապերը:

Մենք նաև սերտորեն համագործակցում ենք անվտանգության և պաշտպանության ոլորտներում՝ Խաղաղության եվրոպական հիմնադրամի շրջանակներում՝ համատեղ ջանքեր գործադրելով հիբրիդային սպառնալիքների դեմ: Ինչպես գիտեք, Եվրոպական միության գործընկերության առաքելությունը հաստատվել է անցյալ տարվա ապրիլին և ուղղված է Հայաստանի ժողովրդավարական դիմակայունության ամրապնդմանը: Սա շոշափելի առաջընթաց է ընդհանուր մարտահրավերներին դիմակայելու մեր համատեղ հանձնառության մեջ:

Անշուշտ, մեզ համար շատ կարևոր է պաշտպանել սեփական ճակատագիրն ընտրելու հայ ժողովրդի ազատությունը: Դուք կարող եք հույս դնել այն բանի վրա, որ ԵՄ-ն այս ճանապարհը կանցնի ձեզ հետ միասին:

Հայաստանը հանդիսանում է առանցքային հենասյուն Հարավային Կովկասի հետ մեր հարաբերություններում, ինչպես նաև Հարավային Կովկասի միջոցով Եվրոպան կապում է Կասպից ծովի և Կենտրոնական Ասիայի հետ: Այդպիսին է մեր տարածաշրջանների պատմությունը, և այդպիսին է նրանց ապագան:

Հենց այդ պատճառով Եվրոպական հանձնաժողովը և նախագահ ֆոն դեր Լայենը, անկասկած, կընդգծեն այս գագաթնաժողովի կոնկրետ արդյունքները, որոնց ընդունմամբ մենք կկարողանանք զարգացնել մեր ռազմավարական գործընկերությունը՝ հանուն համատեղ խաղաղ ապագայի, ի բարօրություն հայ ժողովրդի և Եվրոպայի: Շնորհակալություն»,- ասել է Կոշտան: