Հայաստանն ամենաշատն արտահանել է ՌԴ, ԱՄԷ և Չինաստան. արտահանման ծավալները նվազել են

Հայաստանը կրկին ամենաշատն արտահանել է թանկարժեք և կիսաթանկարժեք քարեր, թանկարժեք մետաղներ:

Հայաստանն այս տարվա առաջին կիսամյակում՝ հունվար-հունիսին, ամենամեծ ծավալի արտահանում է իրականացրել դեպի Ռուսաստան, ապա Արաբական Միացյալ Էմիրություններ ու Չինաստան:Արտահանման ծավալները, սակայն, նվազել են: Այս մասին են վկայում Վիճակագրական կոմիտեի հրապարակած ցուցանիշները:

Հայաստանն այս տարվա առաջին կիսամյակում արտահանել է 3 մլրդ 755 մլն 639.8 հազար դոլարի արտադրանք, ինչը նախորդ տարվա նույն ժամանակահատվածի նկատմամբ նվազել է 52.8 տոկոսով: ԵԱՏՄ երկրներ արտահանումը կազմել է 1 մլրդ 446 մլն 588.2 հազար դոլար, որը 2024-ի նույն ժամանակահատվածի նկատմամբ նվազել է 5.2 տոկոսով: ԵՄ երկրներ արտահանումն աճել է 1.8 տոկոսով՝ կազմելով 286 մլն 763.3 հազար դոլար: Հայաստանն այս տարվա առաջին 6 ամսում ամենամեծ ծավալի արտահանումն արել է Ռուսաստան՝ 1 մլրդ 346 մլն 124.8 հազար դոլարի, որը նախորդ տարվա նույն ժամանակահատվածի նկատմամբ նվազել է 6.2 տոկոսով:

Հայաստանից արտահանման ծավալներով երկրորդը Արաբական Միացյալ Էմիրություններն է՝ 1 մլրդ 90 մլն 790.6 հազար դոլար ծավալով, ցուցանիշը նվազել է 70.3 տոկոսով:

Երրորդ տեղում Չինաստանն է՝ 288 մլն 320.2 հազար դոլար արտահանման ծավալով, այն նախորդ տարվա առաջին 6 ամսվա նկատմամբ նվազել է 59.6 տոկոսով:

37.5 անգամ աճել է Բրազիլիա արտահանումը՝ կազմելով 2 մլն 951.1 հազար դոլար: 2.7 անգամ ավելացել է դեպի Ճապոնիա արտահանումը՝ կազմելով 10 մլն  276 հազար դոլար: Ավստրիա արտահանվել է 5 մլն 415.4 հազար դոլարի ապրանք՝ նախորդ տարվա նույն ժամանակաշրջանի նկատմամբ աճելով 2.6 անգամ:

Ինչ վերաբերում է ապրանքատեսակներին, ապա Հայաստանը կրկին ամենաշատն արտահանել է թանկարժեք և կիսաթանկարժեք քարեր, թանկարժեք մետաղներ և դրանցից իրեր՝ 1 մլրդ 299 մլն 506.7 հազար դոլարի, սակայն այն նախորդ տարվա նույն ժամանակաշրջանի նկատմամբ նվազել է 77 տոկոսով:

Ծավալներով երկրորդը մեքենաներ, սարքավորումներ և մեխանիզմներն են՝ 551 մլն 200.3 հազար դոլարի, նախորդ տարվա առաջին 6 ասմվա նկատմամբ այն նվազել է 9.4 տոկոսով: Արտահանման ծավալներով երրորդ տեղում պատրաստի սննդի արտադրանքն է, առաջին 6 ամսում Հայաստանից արտահանվել է 550 մլն 774.5 հազար դոլարի, նախորդ տարվա առաջին 6 ամսվա նկատմամբ աճը 31.9 տոկոս է: