Հայաստանը Ճապոնիան դիտարկում է որպես երկիր, որի արժեքները համընկնում են մեր երկրի զարգացման տեսլականին. Պապոյան

Էկոնոմիկայի նախարարությունից հայտնում են, որ նախարար Գևորգ Պապոյանը Տոկիոյում մասնակցել է «Հայաստանի տնտեսական ներուժի բացահայտում. ներդրումային հնարավորություններ և Ճապոնիայի հետ գործարար երկխոսության հեռանկարներ» գործարար համաժողովին։ 

Համաժողովը կազմակերպվել էր Ճապոնիայի ROTOBO բիզնես ասոցիացիայի հետ համատեղ։

Նախարարը համաժողովի ընթացքում ներկայացրել է Հայաստանի տնտեսական տեսլական 2030-ը, տարածաշրջանային ինտեգրմանը վերաբերող մի շարք հարցեր, ինչպես նաև անդրադարձել է Ճապոնիայի հետ երկկողմ համագործակցության հնարավորություններին։

Գևորգ Պապոյանն իր ելույթում ընդգծել է, որ Հայաստանն ունի ռազմավարական բարենպաստ դիրք, տաղանդավոր աշխատուժ ու առաջադեմ տնտեսական տեսլական, և Ճապոնիայի հետ համատեղ Հայաստանը կարող է այս ուժեղ կողմերը վերածել հաջողության պատմության։

«Հայաստանը Ճապոնիան դիտարկում է ոչ միայն որպես առևտրային և ներդրումային գործընկեր, այլև որպես մի երկիր, որի արժեքները՝ ճշգրտությունը, նորարարությունն ու երկարաժամկետ տեսլականը, խորապես համընկնում են մեր սեփական զարգացման նպատակների հետ։ Այսօրվա համաժողովի նպատակն է ցուցադրել կոնկրետ հնարավորությունները և բացահայտել համագործակցության նոր ուղիներ»,- նշել է Գևորգ Պապոյանը։

Նախարարը փաստել է, որ Հայաստանում ներկայումս առաջնահերթ ուղղություններից է բարձր հավելյալ արժեք ունեցող ոլորտների զարգացումը, որոնց թվում առանձնահատուկ կարևորություն է տրվում տեղեկատվական տեխնոլոգիաների, բարձր տեխնոլոգիական արդյունաբերության, վերականգնվող էներգետիկայի, դեղագործության և զբոսաշրջության ոլորտներին։