Հայաստանն ու Վրաստանը քննարկել են առևտրի, տարանցման և զբոսաշրջության զարգացման հարցեր

ՀՀ էկոնոմիկայի նախարար Գևորգ Պապոյանի հրավերով Հայաստանում է գտնվում Վրաստանի էկոնոմիկայի և կայուն զարգացման նախարար Մարիամ Կվրիվիշվիլիի գլխավորած պատվիրակությունը։

Այս մասին հայտնում են ՀՀ էկոնոմիկայի նախարարությունից։

Այցի շրջանակում ՀՀ էկոնոմիկայի նախարարությունում կայացել է երկու երկրների նախարարների պաշտոնական հանդիպումը։

Հայաստան–Վրաստան երկկողմ օրակարգի շրջանակում կողմերը քննարկել են համագործակցության ընդլայնմանն ուղղված մի շարք առաջնահերթություններ՝ ընդգծելով տնտեսական կապերի ռազմավարական նշանակությունն ու փոխշահավետ զարգացման հանձնառությունը։

«Համոզված եմ, որ մեր տնտեսական համագործակցության առկա ներուժը դեռևս ամբողջությամբ իրացված չէ, և այսօրվա հանդիպումը կարևոր հնարավորություն է համադրելու մեր ջանքերը՝ ի շահ մեր ժողովուրդների», - նշել է Գևորգ Պապոյանը։

Քննարկման առանցքում եղել են առևտրատնտեսական հարաբերությունների խորացումը, բեռների անխոչընդոտ տարանցման ապահովումը, ինչպես նաև զբոսաշրջության ոլորտի զարգացումը։

Կողմերը կարևորել են նաև գործարար շրջանակների միջև ուղիղ կապերի ակտիվացումը՝ մասնավորապես B2B ձևաչափով հանդիպումների խթանման միջոցով։

Հանդիպման ավարտին նախարարները վերահաստատել են երկկողմ համագործակցության հետագա խորացման պատրաստակամությունը՝ ընդգծելով շարունակական երկխոսության անհրաժեշտությունը։