Արմավիրում և Արարատում հայտնաբերվել են ապօրինի ջրօգտագործման դեպքեր

Այս գործողությունները միտված են ջրային ռեսուրսների պահպանությանը և ապօրինի ջրօգտագործման դեպքերի կանխմանը։

Բնապահպանության և ընդերքի տեսչական մարմինը Արմավիրի և Արարատի մարզերում իրականացրած ստուգայցերի ընթացքում հայտնաբերել է ապօրինի ջրօգտագործման մի շարք դեպքեր։

Արմավիրի մարզի Ապագա բնակավայրում երկու քաղաքացի, իսկ Լուսագյուղում՝ մեկ անձ, ոռոգման նպատակով շահագործել են ապօրինի խորքային երեք հոր։

Միաժամանակ Արարատի մարզում ևս արձանագրվել են խախտումներ։ Նորամարգ բնակավայրում «Ռիվեռ Լանդ» ՍՊԸ-ն և մեկ այլ անձ, Արևաբույրում՝ մեկ քաղաքացի, Նիզամիում՝ ևս մեկ անձ ապօրինի օգտագործել են խորքային հորեր՝ առանց համապատասխան թույլտվությունների։

Ընդհանուր առմամբ արձանագրվել է ապօրինի շահագործվող 7 խորքային հոր։

Տեսչական մարմնի տարածքային ստորաբաժանումների ղեկավարների որոշմամբ բոլոր հորերի շահագործումը կասեցվել է։

Այս գործողությունները միտված են ջրային ռեսուրսների պահպանությանը և ապօրինի ջրօգտագործման դեպքերի կանխմանը։