Ամերիկացի գործարար և տեխնոլոգիական հսկա Իլոն Մասկը գրող ու լրագրող Ուոլթեր Այզեքսոնի (Walter Isaacson) փոդքաստի ընթացքում հայտարարել է, որ արհեստական բանականությունը (ԱԲ) կարող է գոյաբանական սպառնալիք ներկայացնել մարդկության համար։ Մասկն ընդգծել է, որ քանի որ անձամբ չի կարող կանգնեցնել տեխնոլոգիական այդ ընթացքը, նախընտրում է լինել գործընթացի անմիջական մասնակիցը, այլ ոչ թե պասիվ դիտորդ:
Ինչու է դա կարևոր. ԱԲ անվտանգության և զարգացման տեմպերի շուրջ բանավեճը հասել է գագաթնակետին: Anthropic-ի ղեկավար Դարիո Ամոդեիի՝ ԱԲ մոդելների զարգացումը համակարգված կերպով դանդաղեցնելու կոչին համամիտ են նաև Իլոն Մասկն ու OpenAI-ի գլխավոր տնօրեն Սեմ Ալթմանը։ Մինչդեռ քաղաքական դաշտում դիրքորոշումներն այլ են․ ԱՄՆ նախագահ Դոնալդ Թրամփը հայտարարել է, որ չունի նման մտավախություններ՝ առաջնահերթություն համարելով ԱՄՆ տեխնոլոգիական գերազանցության ապահովումը Չինաստանի նկատմամբ։
Տեխնոլոգիական առաջնորդների և քաղաքական գործիչների դիրքորոշումները.
Իլոն Մասկ. «Կարծում եմ՝ կա որոշակի հավանականություն, որ դա կարող է լինել գոյաբանական սպառնալիք։ Բայց ես ոչինչ չեմ կարող անել դա կանգնեցնելու համար։ Ուստի եկել եմ այն եզրակացության, որ ունեմ երկու տարբերակ՝ լինել մասնակից կամ դիտորդ։ Կարծում եմ՝ մասնակից լինելն ավելի հետաքրքիր է»։
Դարիո Ամոդեի (Anthropic), Սեմ Ալթման (OpenAI) և Մասկ.
Ամոդեին առաջարկել է դանդաղեցնել առաջադեմ ԱԲ մոդելների մշակման տեմպերը՝ շահելով 1-2 տարի լրացուցիչ ժամանակ:
Նպատակն է թույլ չտալ, որ մոդելները հասնեն զարգացման կրիտիկական անվերահսկելի մակարդակների և խուսափել լուրջ սխալ հաշվարկներից:
Դոնալդ Թրամփ (ԱՄՆ նախագահ).
Հայտարարել է, որ մտավախություններ չունի մարդկության գոյությանը ԱԲ սպառնալիքի մասով։
Ամենակարևոր նպատակն է համարում ԱՄՆ-ի առաջատար դիրքերի և գերազանցության ապահովումը Չինաստանի և այլ մրցակիցների նկատմամբ:
