Apple-ի մեծ թարմացումը․ ինչպիսին կլինի iPhone 17-ը և նոր iPhone 17 Air-ը

Apple-ը պատրաստվում է 2025-ին ներկայացնել նոր iPhone 17 շարքը, և այս անգամ փոփոխությունները խոստանում են լինել ամենամեծերից մեկը՝ iPhone X-ից հետո։

Նոր iphone 17 Air

Այս տարվա գլխավոր նորույթը լինելու է iPhone 17 Air-ը։ Այն չի լինի «Plus»-ի ուղղակի փոխարինողը, այլ բոլորովին նոր մոդել՝ ավելի բարակ ու թեթև դիզայնով։ Ասվում է, որ դրա հաստությունը կկազմի մոտ 6 մմ, իսկ էկրանի չափը՝ 6.6 դյույմ։ Գնային առումով այն կդրվի ստանդարտ iPhone 17-ի և Pro մոդելների միջև։

Բոլոր մոդելները կստանան ավելի նեղ շրջանակներ և ProMotion էկրան՝ 120 Հց թարմացման արագությամբ։ Սա նշանակում է, որ սահուն սկրոլինգն ու հոսքային տեսանյութերի որակը այլևս միայն Pro-ի առանձնահատկությունը չեն լինի։ Լուրեր կան նաև նոր գույների մասին․ կանաչ, մանուշակագույն և բաց կապույտ։

Apple-ը պատրաստվում է զգալիորեն բարելավել տեսախցիկները։ iPhone 17 Air-ը կստանա 48 մեգապիքսելանոց հետևի տեսախցիկ, մինչդեռ Pro Max-ը կլինի առաջին iPhone-ը՝ երեք 48 ՄՊ տեսախցիկներով և 8K վիդեո նկարահանմամբ։ Բոլոր մոդելները կստանան նաև թարմացված 24 ՄՊ առջևի տեսախցիկ։

2025-ի iPhone-ները կգործեն նոր A19 չիպով, որն ավելի արագ և արդյունավետ է։ Բացի այդ, առաջին անգամ iPhone 17 Air-ում կօգտագործվի Apple-ի սեփական Wi-Fi 7 և 5G մոդեմը։ Մարտկոցները նույնպես կդառնան ավելի հեշտ փոխարինվող, իսկ անլար լիցքավորումը կհասնի մինչև 25 Վտ։

Ըստ տեղեկությունների՝ iPhone 17 շարքը կներկայացվի սեպտեմբերի 9-ին, նախնական պատվերները կսկսվեն սեպտեմբերի 12-ին, իսկ վաճառքը՝ սեպտեմբերի 19-ին։ iPhone 17 Air-ի գինը կարող է կազմել մոտ 899 դոլար։